پووختەی هەواڵەکە:

• وەزیرانی دارایی و نەوتی عێراق ڕێکارەکانی ئامادەکردنی پڕۆژە بودجەی 2027ـیان تاوتوێ کرد.

• پێشبینی دەکرێت نرخی بەرمیلێک نەوت لەنێوان 60 بۆ 65 دۆلار خەمڵاندنی بۆ بکرێت.

• جێگیرکردنی فەرمانبەرانی گرێبەست و دامەزراندنی دەرچووانی نەوت دەخرێتە ناو بودجەوە.

• بەڕێوەبەری کۆمپانیای سۆمۆ و فەرمانگە داراییەکان لە داڕشتنی ڕەشنووسەکەدا بەشدارن.

---

وەزارەتەکانی دارایی و نەوتی عێراق دەستیان بە داڕشتنی ڕەشنووسی پڕۆژەیاسای بودجەی گشتیی ساڵی 2027 کردووە بە مەبەستی دیاریکردنی نرخی بنەڕەتیی بەرمیلێک نەوت و چارەسەرکردنی دۆسیەی دامەزراندنەکان. سەرەڕای بەرزبوونەوەی نرخی نەوتی برێنت بۆ سەرووی 100 دۆلار، بەغداد پلان دادەنێت نرخێکی کەمتر بۆ بەرمیلێک نەوت لە بودجەدا جێگیر بکات بۆ دوورکەوتنەوە لە کورتهێنانی دارایی بەهۆی ئاڵۆزییە ناوچەییەکان.

---

بڕیار و تەوەرە سەرەکییەکانی کۆبوونەوەی وەزارەتی نەوت و دارایی:

• باسم محەممەد، وەزیری نەوت و فالح ساری، وەزیری دارایی میکانیزمی دیاریکردنی نرخی نەوتیان لە بودجەی 2027 تاوتوێ کرد.

• ڕێککەوتن لەسەر زیادکردنی بڕگەی تایبەت بە جێگیرکردنی فەرمانبەرانی گرێبەست و خاوەن کرێی ڕۆژانە لەسەر میلاکی هەمیشەیی.

• تەرخانکردنی بودجەی پێویست بۆ دامەزراندنی فەرمیی دەرچووانی پەیمانگەکانی نەوت لە سەرجەم پارێزگاکاندا.

• بەشداریکردنی بەڕێوەبەری گشتیی کۆمپانیای سۆمۆ و فەرمانگەی ئابووری بۆ دیاریکردنی توانای هەناردەکردن و پێشبینیی داهاتەکان.

• جەختکردنەوە لەسەر بەردەوامیی هەماهەنگیی تەکنیکی تاوەکو ڕەشنووسەکە لە وادەی یاساییدا ئاڕاستەی ئەنجوومەنی وەزیران بکرێت.

پێشبینیی نرخی نەوت و جیاوازیی لەگەڵ بودجەی سێ ساڵە:

لە بەرامبەردا سەبارەت بە پێشبینییە داراییەکان، عێراق لە یاسای بودجەی سێ ساڵەی 2023، 2024 و 2025دا نرخی هەر بەرمیلێک نەوتی بە 70 دۆلار جێگیر کردبوو، بەڵام بۆ بودجەی 2027 بەهۆی گرژییە سەربازییەکانی نێوان ئەمریکا و ئێران و نادڵنیایی لە بازاڕەکانی وزە، پێشبینی دەکرێت نرخەکە لەنێوان 60 بۆ 65 دۆلار دابنرێت؛ ئەمەش سەرەڕای ئەوەی نرخی نەوتی خاوی برێنت لە بازاڕەکانی جیهاندا لە سەرووی 100 دۆلارەوە مامەڵەی پێوە دەکرێت، بە ئامانجی پاراستنی هاوسەنگیی دارایی دەوڵەت و ڕێگریکردن لە کورتهێنانی بودجە.

ئابووریی عێراق بە ڕێژەی زیاتر لە 90% پشت بە داهاتی نەوتی خاو دەبەستێت بۆ پڕکردنەوەی خەرجییە گشتییەکان، بەتایبەت مووچەی مووچەخۆران و خەرجییە بەکاربەرەکان کە ساڵانە بەشە شێری بودجە پێکدەهێنن. بەهۆی قەبارەی گەورەی دامەزراندن و جێگیرکردنی فەرمانبەرانی گرێبەست، خەرجیی مووچە لە عێراق بەرزبوونەوەی بەرچاوی بەخۆیەوە بینیوە.

کۆتاییهاتنی وادەی کارپێکردنی بودجەی سێ ساڵە لە کۆتایی ساڵی 2025، حکومەتی فیدراڵ ناچار دەکات بودجەیەکی نوێ بۆ 2027 ئامادە بکات، کە تێیدا لەسەر بنەمای پێشبینییەکانی کۆمپانیای سۆمۆ، هاوسەنگی لەنێوان داواکارییەکانی کەرتی نەوت و توانای دارایی دەوڵەتدا ڕابگرێت.

زانیاری زیاتر بۆ تۆ:

وەزیرانی نەوت و دارایی بۆ دیاریکردنی نرخی بەرمیلێک نەوت لە بودجەی 2027دا کۆبوونەوە

وەزارەتی دارایی ئامادەکارییەکانی پڕۆژەیاسای بودجەی 2027 چڕ دەکاتەوە

عەلى زەیدى: بەرهەمهێنانى نەوت دەگەیێنینە 10 ملیۆن بەرمیل لە ڕۆژێکدا