سەباح نوعمان بۆ کەناڵ8: کشانەوەی هاوپەیمانان لە هەولێر و بەغداد دەستیپێکرد
پووختەی هەواڵەکە:
- کشانەوەی هێزەکانی هاوپەیمانیی نێودەوڵەتی لە شاری هەولێر دەستیپێکرد.
- بارەگای سەرەکیی هێزەکانی ئەمریکا لە فڕۆکەخانەی بەغداد ڕادەستی سوپا کرا.
- تاوەکو 30ـی ئەیلوول تەواوی هێزە بیانییەکان لە عێراق دەکشێنەوە.
- بەبۆنەی کشانەوەی هێزەکانەوە چوار ڕۆژ پشووی فەرمی لە عێراق ڕاگەیەندرا.
قۆناغی کۆتایی کشانەوەی هێزەکانی هاوپەیمانیی نێودەوڵەتی لە هەولێر و بەغداد دەستیپێکردووە و بارەگا سەربازییەکان ڕادەستی هێزە عێراقییەکان دەکرێنەوە، لە کاتێکدا کەمتر لە 48 کاتژمێر بۆ وادەی ڕاگەیاندنی فەرمیی چۆڵکردنی تەواوەتیی بنکەکان لە 30ـی ئەیلوول ماوە.
گوتەبێژی فەرماندەی گشتیی هێزە چەکدارەکان و بەرپرسانی ئەمنی بە کەناڵ8ـیان ڕاگەیاند:
- سەباح نوعمان، گوتەبێژی فەرماندەی گشتی پشتڕاستیکردەوە کە پرۆسەی کشانەوە لە هەرێمی کوردستان دەستیپێکردووە.
- تاوەکو وادەی دیاریکراو لە 30ـی مانگ هیچ هێزێکی بیانی لە عێراقدا نامێنێتەوە.
- بارەگای سەرەکیی هێزەکانی ئەمریکا لە فڕۆکەخانەی نێودەوڵەتیی بەغداد ڕادەستی هێزەکانی عێراق کراوە.
- سەعد مەعن، سەرۆکی ڕاگەیاندنی شانەی ئەمنی ئاشکرای کرد کە ڕێککەوتن لەگەڵ تورکیا بۆ وەرگرتنەوەی بنکەی سەربازیی باشیک کراوە.
- عێراق توانای تەواوی هەیە بۆ بەردەوامیدان بە پاراستنی سەقامگیری لەسەر بنەمای سەروەریی نیشتمانی.
هەڵوێستی نێودەوڵەتی و ڕاگەیاندنی ڕۆژی سەروەری:
لە لایەکی دیکەوە، بەرپرسێکی حکومەتی عێراق بە ئاژانسی هەواڵی دی پی ئەی ئەڵمانی ڕاگەیاندووە کە سەرجەم هێزە ئەمریکییەکان و تیمە لۆجیستیکییەکان بە تەواوی کشاونەتەوە؛ هاوکات بە مەبەستی ڕاگەیاندنی ڕۆژی سەروەری لە 30ـی ئەیلوول و کۆتاییهاتنی ئەرکی سەربازیی هاوپەیمانان، چوار ڕۆژ پشووی فەرمی لە سەرانسەری عێراق ڕاگەیەندراوە بۆ ئەنجامدانی ڕێوڕەسمی وەرگرتنەوەی بنکە سەربازییەکان.
پێشینەی ڕێککەوتنی کشانەوە و بنکە سەربازییەکان:
پرۆسەی چۆڵکردنی بنکەکان پاڵپشتە بەو ڕێککەوتننامەیەی لە ساڵی 2024 لەنێوان بەغداد و واشنتن واژۆ کرا؛ بەپێی داتاکانی وەزارەتی بەرگریی ئەمریکا (پێنتاگۆن)، پێشتر نزیکەی 2 هەزار و 500 سەربازی ئەمریکی لە ناوچە جیاوازەکان جێگیرکرابوون، کە لە قۆناغی کۆتاییدا لە بنکەی سەربازیی فڕۆکەخانەی هەولێر، بنکەی کەمپ ڤیکتۆریا لە فڕۆکەخانەی بەغداد و ناوچەی سەوز مابوونەوە پێش ئەوەی بە تەواوی پاشەکشەیان پێبکرێت.
زانیاریی زیاتر بۆ تۆ:
بەرپرسێکی عێراقی: سوپای ئەمریکا بە تەواوی لە عێراق کشاوەتەوە
2 کاتژمێر پێش ئێستا