هەوڵەکان لە بەغداد چڕ دەکرێنەوە؛ شاندی هەرێم بۆ مووچەی زیندانیانی سیاسی لەگەڵ وەزیری دارایی کۆدەبێتەوە
پووختەی هەواڵەکە
- شاندى باڵاى وەزارەتى کاروبارى شەهیدان لەگەڵ سەرۆککۆمارى عێراق کۆدەبنەوە.
- هەروەها شاندەکە بڕیارە لەگەڵ وەزیری دارایی عێراق کۆببنەوە.
- ئەحمەد مام ڕەسوڵ: ئامانجمانە مینحەى زیندانییانى سیاسىى لە پڕۆژەی بودجە جێگیر بکەین.
ئەحمەد مام ڕەسوڵ، بەڕێوەبەری کاروباری زیندانییانی سیاسی لە وەزارەتى کاروبارى شەهیدان لە بەغدادەوە بە کەناڵ8ـى ڕاگەیاند، "نیوەڕۆى ئەمڕۆ دووشەممە کاتژمێر 12:00 لەگەڵ نزار ئامێدى سەرۆککۆمارى عێراق کۆدەبینەوە تایبەت بە پاڵپشتیکردن و پشتیوانیى سەرۆککۆمار بۆ دۆسیەى زیندانیانى سیاسی و جێگیرکردنى مینحەکانیان لە پڕۆژە بودجەى 2027ـى عێراق".
ئەحمەد مام ڕەسوڵ، بەڕێوەبەری کاروباری زیندانییانی سیاسی:
- سەرۆککۆمار ڕۆڵێکى ئەرێنى زۆرى هەبووە لە ڕابردوودا لە دۆسییەى زیندانیانى سیاسیی هەرێمى کوردستان و پاڵپشتى گواستنەوەى دۆسییەکانى بۆ بەغداد کردووە.
- پاش کۆبوونەوەمان لەگەڵ سەرۆککۆمار بڕیارە لەگەڵ چەند لایەنێکى سیاسى و فالح سارى وەزیرى دارایی عێراق کۆببینەوە بۆ ئەوەى دڵنیاببینەوە لە جێگیرکردنى مینحەى زیندانیانى سیاسی لە بودجەدا.
- شەو و ڕۆژ لە بەغداد دیدار و کۆبوونەوە دەکەین بۆ پشتگیرى و پشتیوانى لە دۆسییەى زیندانیانى سیاسی و هاوتاکردنی مینحەکانیان.
دۆسییەی شەهیدانی زیندوو( زیندانە سیاسییەکان)
ئامانجى وەزارەتى کاروبارى شەهیدانى هەرێمى کوردستان ئەوەیە، زیندانییانی سیاسی لە هەرێمی کوردستان، کە پێشتر دۆسیەى 25 هەزار و 868 زیندانیی سیاسی بۆ هاوتاکردن ڕادەستی دەستەی عێراقی کراوە، مینحەیان وەک زیندانیانى سیاسیی عێراق بۆ دابین بکرێت.
لە عێراق 158 هەزار زیندانى سیاسیی مینحە وەردەگرن و بەسەر سێ پۆلدا دابەشکراون، پۆلى یەکەم 400 هەزار دینار، پۆلى دووەم 800 هەزار دینار و پۆلى سێیەم یەک ملیۆن و 200 هەزار دینار وەردەگرن.
زانیاری زیاتر بۆ تۆ
شاندی هەرێمی کوردستان لە بەغدادە؛ دۆسییەی زیندانیانی سیاسی دەخرێتە ناو بودجەی 2027
