ڕێکخراوی کۆچی نێودەوڵەتی: 639 خێزانی ئاوارەی کەمپەکانی عێراق بۆ ناوچەکانی خۆیان گەڕاونەتەوە
پووختەی هەواڵەکە
ڕێکخراوی کۆچی نێودەوڵەتی ڕایگەیاندووە، 639 خێزانی ئاوارەی کەمپەکانی عێراق گەڕاونەتەوە بۆ ناوچەکانی خۆیان.
لایەنە پەیوەندیدارەکان لە هەوڵدان بۆ تێکەڵکردنەوەی ئەو کەمپانەی کە ماوە لە هەولێر و لە موسڵ.
ڕێکخراوی کۆچی نێودەوڵەتی باسی لەوەکردووە، لەسەرەتای ساڵەوە، 639 خێزان کە لە سێ هەزار و 834 کەس پێکهاتوون و ئاوارەی کەمپەکان بوون، گەڕاونەتەوە زێدی خۆیان. دەشڵێن، گەڕانەوەی ئەو ئاوارانە بە خواستی خۆیان بووە.
باسکال ریتنجنز سەرۆکی نێردەی ڕێکخراوی کۆچی نێودەوڵەتی بە ڕۆژنامەی فەرمیی عێراقی:
هەوڵەکانی حکومەتی عێراق بۆ گەڕاندنەوەی ئاوارەکان بۆ ناوچەکانی خۆیان بەردەوامە و بە هەماهەنگی لەگەڵ ڕێکخراوە نێودەوڵەتییەکان بەڕێوەدەچێت.
هێشتا پاڵپشتی دارایی بۆ گەڕانەوەی ئاوارەکان بە خواستی خۆیان بەردەوامە.
لەهەماهەنگیدان لەگەڵ حکومەتی عێراق بۆ داخستنی کەمپەکان و کۆکردنەوەی ئەو ئاوارانەی کە ماون لە چەند کەمپێکی کەمدا، ئەوەش لە ڕێگەی تیمەکانی کارەوە بۆ دانانی چارەسەری بەردەوام لەگەڵ لایەنە پەیوەندیدارەکان.
حکومەتی عێراق ڕژدە لەسەر تێکەڵکردنی هەردوو کەمپی بەحرکە و دیبەگە لە هەولێر، لەگەڵ تێکەڵکردنی سێ کەمپی ڕۆژهەڵاتی موسڵ و کردنیان بە یەک دانە .
بۆ ئەو مەبەستەش هەماهەنگی لەگەڵ هەرێمی کوردستان دەکەن و لەهەر هەنگاوێکدا ڕاگەیاندنی فەرمییان دەبێت بە داخستنی کەمپەکە یان تێکەڵکردنی.
ڕێکخراوەکە ئەوەی خستووەتەڕوو، لەپاش داخستنی کەمپی ئاشتی لە سلێمانی لە 2024، هەزار و 100 خێزان گەڕاونەتەوە بۆ شارۆچکەی دوجەیل لە پارێزگای سەڵاحەدین و هەر خێزانێکی شایستە بڕی چوار ملیۆن دیناری پێدراوە..
