• تەرمى دووان لە منداڵەکان دۆزراونەتەوە و بە دواى سێیەمدا دەگەڕێن.

• قاچاخچییەکان کوردن و کەسوکارەکەی داوای دەستگیرکردنیان دەکەن.

• وێنەى تەرمى دووان لە منداڵەکان پیشانى دایکوباوکیان دراوە.

هێشتا تەرمی منداڵێکى ئەو خێزانە نەدۆزراوەتەوە کە ڕۆژى 13ـى ئەم مانگە بەلەمەکەیان لەنێوان تورکیا و یۆنان ژێرئاو کەوت، بڕیارە 24 کاتژمێری دیکە گەڕان بەردەوام بێت.

بارزان ڕەزا، خاڵۆى منداڵەکان بۆ کەناڵ8:

ئەمڕۆ بۆ چوارەم ڕۆژ لەسەریەک گەڕان بەدوای تەرمی خوشکەزاکانمدا بەردەوامە.

تەرمی دووان لە خوشکەزاکانم دۆزراونەتەوە و تەنیا تەرمی هەستیار ماوە.

لە تورکیا سکاڵامان لەسەر قاچاخچییەکان تۆمارکردووە و داوای دەستگیرکردنیان دەکەین.

قاچاخچییەکان کوردن و خەڵکی هەولێرن.

هەوڵ هەیە گەڕان بەدوای تەرمی سێیەم منداڵدا بوەستێت.

تەرمی منداڵەکان نەدراوەتەوە دەست دایک و باوکیان، بەڵکو تەنیا بە وێنەیان پیشاندراوە.

کۆمەڵەی پەنابەرە گەڕاوەکان بەدواداچوونى کردووە

بەکر عەلی، سەرۆکی کۆمەڵەکە بۆ کەناڵ8: لە یەکەم ڕۆژی ڕووداوەکەوە نوێنەری خۆمان ڕاسپاردووە کە لە تورکیا بەدواداچوون بکەن.

بەکر عەلی: بەدواداچوونیش بۆ چارەنووسی دوو قاچاخچییەکە دەکەین.

بەکر عەلی: زیادبوونی ڕێژەی بارانبارین و بەرزبوونەوەی ئاستی ئاو دەکرێت کاریگەریی هەبێت لە دۆزینەوەی تەرمی منداڵەکەى دیکە.

بەکر عەلی: دایک و باوکی منداڵەکە دەستگیرنەکراون، بەڵکو لە نەخۆشخانەن.

چیرۆکى دڵتەزێنى خێزانەکە

خێزانە پێنج کەسییەکەى سلێمانى، کە پێکهاتبوون لە دایک و باوک و سێ منداڵ، 13ـى ئەم مانگە بەهیواى گەیشتن بە ئەورووپا بە بەلەم هەوڵیاندا لە ئاوەکانى نێوان تورکیا و یۆنان بپەڕنەوە، بەڵام بەلەمەکەیان کە ئەم خێزانە و سێ قاچاخچى هەڵگرتبوو ژێرئاو کەوت و تەنیا ژن و پیاوەکە و دووان لە قاچاخچییەکان ڕزگاریان بوو.

ڕۆژى 16ـی مانگ، تەرمى یەکێک لە منداڵەکان (هەریاد) و ڕۆژی 17ـی مانگیش تەرمى دووەم (مێلا )منداڵیان دۆزرایەوە.

زانیاریى زیاتر بۆ تۆ:

بەڵێنی قاچاخچی و بڕیاری کۆچ خەونی سێ منداڵی نوقمی دەریا کرد