بڕیارە ئەنجوومەنى وەزیرانى هەرێمى کوردستان لە کۆبونەوەى ئەم هەفتەیەدا، تاوتوێى بەستنى مینحە بۆ زیاتر لە بیست هەزار زیندانى سیاسیى و رزگاربووانى جینۆسایدى ئەنفال بکات.

بەڕێوەبەرایەتى خزمەتگوزاریى کاروبارى زیندانیانى سیاسیى و رزگاربوانى ئەنفالى سەر وەزارەتی شەهیدانى حکومەتى هەرێمى کوردستان، نوسراوێکى بە ژمارە '325' ئاڕاستەى ئەنجوومەنى وەزیران کردووە، تێیدا داوایکردووە، بەگوێرەى یاساى ژمارە یانزەى 2011، مینحە بۆ 20 هەزار و 591 زیندانى سیاسیى و رزگاربوانى ئەنفال ببەسترێت.

سەرچاوەیەک لە وەزارەتى دارایى، بە کەناڵ8ـى گوت "پێشنیازەکە لەبەردەستماندایە و لەکۆبوونەوەى رۆژى چوارشەممەى ئەنجوومەنى وەزیراندا تاوتوێدەکرێت". بڕیاریشە بەشى یاساى ئەنجوومەنى وەزیران، وردبینى بۆ لیستى ناوى زیندانیانى سیاسیى و رزگاربووانى ئەنفال بکات و لەو بارەیەوە راپۆرتێک ئامادەبکات.

ئەحمەد مام رەسوڵ، بەرێوەبەرى خزمەتگوزاریى کاروبارى زیندانیانى سیاسیى و رزگاربوانى ئەنفال، بە کەناڵ8ـى گوت "داوامان لە حکومەت کردووە تاوەکو ئەو کاتەى مینحەى زیندانیانى سیاسیى و رزگاربووانى ئەنفال لە بودجەى 2025ـى عێراق دەخرێتە سەر دەزگاى زیندانییەکانى عێراق، حکومەتى هەرێمى کوردستان لە داهاتى ناوخۆ مانگانە بڕى هەشت ملیارو 827 ملیۆن و 750 هەزار دینار بۆ مینحەى زیندانیانى سیاسى و رزگاربوانى ئەنفال خەرجبکات.

رۆژى 10ـى ئەیلول ئاوات شێخ جەناب وەزیری دارایی، لەگەڵ نوێنەری زیندانیانی سیاسیی و رزگاربووانی ئەنفال کۆبووەوە و بەڵێنیدا دۆسیەکەیان بۆ وەزارەتی دارایی عێراق بنێردرێت.