ماوەی دوو رۆژە پێنج ئاگری گەورە بەشێک لە دارستانەکانی يۆنانی گرتووەتەوە و بەهۆيەوە فەرمانی چۆڵکردن لە چەند ناوچەيەک دەرکراوە.

بەرپرسانی يۆنان هۆکاری ئاگرکەوتنەوەکە بۆ بەرزی پلەکانی گەرما و هەڵکردنی بای بەهێز دەگەڕێننەوە بەتايبەتی لە بەرەبەيانی ئەمڕۆوە.

رۆژی شەممە یۆنان داوای هاوکاری لە هاوپەیمانەکانی لە یەکێتیی ئەوروپا کرد، هەريەک لە ئيتاڵيا و کۆماری چيک وەڵامی داواکارييەکەيان داوەتەوە، ئاگرەکە مەترسی تەشەنەسەندنی هەيە بۆ 11 ناوچەی ديکە.

يەکێک لە ئاگرە گەورەکانی يۆنان لە دوورگەی کيسرا کەوتووەتەوە کە دوورگەیەکی گەشتیاریيە و سێ هەزار و 600 کەسی تیادا دەژی، لەرێگەی نامەوە دانيشتوانەکەی ئاگادارکراونەتەوە ناوچەکە بەجێبهێڵن.

دەيان ئاگرکوژێنەوە و سێ هێليکۆپتەر و دوو فڕۆکە لە دوورگەکە لە هەوڵی کۆنترۆڵکردنی ئاگرەکەدان.