فەرمانگەی میدیا و زانیاری رایگەیاند،تەمەنی خانەنشینبوونی زیندانییانی سیاسی تاوەکو تەواوکردنی تەمەنی 65 ساڵی درێژکرایەوە.

فەرمانگەی میدیا و زانیاریی هەرێمی کوردستان، بڵاویکردەوە، بە نووسراوی ژمارە (9804)ی دیوانی ئەنجومەنی وەزیران، رەزامەندی درا لەسەر کارکردن و بەردەوامبوونی ئەو فەرمانبەرانەی زیندانیکراو و گیراوی سیاسین، تاوەکو تەواوکردنی تەمەنی 65 ساڵی.

دەشڵێت، بڕیارەکە، سەرجەم زیندانیکراو و گیراوانی سیاسی لە قۆناخەکانی  9تاوەکو 15ی راژە دەگرێتەوە و مووچەی بەردەوامبوونیان لە راژە لەسەر بودجەی وەزارەتەکانیان بۆ خەرجدەکرێت.

لەکۆى 25 هەزارو 807 زیندانیی سیاسیی، زیاتر لە 20 هەزار زیندانیی سیاسی لە هەرێمی کوردستان مینحەیان بۆ نەبەستراوە و دۆسییەکانیان لە ئەنجوومەنى وەزیرانى هەرێمى کوردستانە و پێشتر هەرێمى کوردستان بەگوێرەى یاساى ژمارە 11ى ساڵى 2011 مووچە بە زیندانیانى سیاسى دراوە، مووچەکەشیان لە 250هەزار دینارەوە دەستپێدەکات تاوەکو 500هەزار دینارە.