بەبۆنەی دەستپێکردنی ساڵی نوێی خوێندن لە هەرێمی کوردستان، نەژاد عەبدوڵا، بەڕێوەبەری گشتیی پەروەردەی سلێمانی، لە کۆنفرانسێکی رۆژنامەوانیدا پیرۆزبایی ساڵی نوێی خوێندنی لە مامۆستایان و خوێندکاران کرد و جەختی لە رۆڵی گرنگی مامۆستایان کردەوە.

دڵسۆزی مامۆستایان لە پرۆسەی خوێندندا

نەژاد عەبدوڵا رایگەیاند، ئەگەر دڵسۆزی مامۆستایان نەبووایە لە ساڵانی رابردوودا، پرۆسەی خوێندن بە شێوەیەکی تەندروست بەڕێوەنەدەچوو. ئاماژەی بەوەشکرد سەرەڕای قەیران و ئاڵنگاری و بێ مووچەیی، مامۆستایان بە خۆنەویستانە شانیان داوەتە بەر هەموو قەیرانەکان. هیواشی خواست بۆ ئەمساڵیش مامۆستایان دڵسۆزی و خەمخۆری خۆیان بۆ بواری پەروەردە دووپاتبکەنەوە.

داواکاری بۆ چارەسەرکردنی کێشەی مووچە

بەڕێوەبەری گشتیی پەروەردەی سلێمانی داوای لە بەرپرسانی حکومەتی هەرێمی کوردستان و حکومەتی فیدراڵ کرد کە بگەنە رێککەوتن لەسەر ئەو پرسانەی پەیوەندی بە مووچەوە هەیە. گوتیشی ماوەی 11 ساڵە سەرەرای بێ مووچەیی و قەیرانەکان، مامۆستایان نەیانهێشتووە داهاتووی هیچ خوێندکارێک بفەوتێت و بەردەوام بوون لە ئەرکەکانیان.