بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ مەسعود بارزانی، سەرۆکی پارتی دیموکراتی کوردستان کۆبوونەوە و پرۆسەی سیاسی و پێکهێنانی کابینەی تازەی هەرێمی کوردستانیان تاوتوێکرد.

کۆبوونەوەی مەسعود بارزانی و بافڵ جەلال تاڵەبانی

ئەمڕۆ ڕۆژی شەممە 27ی ئەیلوولی 2025 لە سەڵاحەدین، مەسعود بارزانی پێشوازیی لە بافڵ جەلال تاڵەبانی سەرۆکی یەکێتیی نیشتمانیی کوردستان کرد.

پرۆسەی سیاسی و پێکهێنانی کابینەی نوێ تاوتوێکرا

لە راگەیاندراوی کۆبوونەوەکەی نێوان مەسعود بارزانی، سەرۆکی پارتی دیموکراتی کوردستان و بافڵ جەلال تاڵەبانی سەرۆکی یەکێتیی نیشتمانیی کوردستاندا، ئاماژە بەوەکراوە، کە "لە دیدارەکەدا بارودۆخی سیاسیی عێراق و ناوچەکە و پرۆسەی سیاسیی هەرێمی کوردستان و پێکهێنانی حکومەتی تازەی هەرێم تاوتوێ کراوە".

کۆبوونەوەکەی 14ـی تەمموز بەرهەمداربوو

رۆژى 14ـى تەمموزى 2025، کۆبوونەوەى هاوبەشى نێوان پارتى دیموکراتى کوردستان و یەکێتیی نیشتمانیی کوردستان، لە پیرمام بە سەرپەرشتیى بافڵ جەلال تاڵەبانى، سەرۆکى یەکێتى و مەسعود بارزانى، سەرۆکى پارتى ئەنجامدرا و پاش کۆبوونەوەکە راگەیەندراوى هاوبەشى هەردوولا بڵاوکرایەوە.

هاوڕابوون بۆ چارەسەرکردنی کێشەکان

لەو کۆبوونەوەیەشدا هەردوولا هاوڕابوون هەموو هەوڵەکان چڕبکرێنەوە بۆ چارەسەرى کێشەکان و دابینکردنى مووچە و شایستە داراییەکانى هەرێمى کوردستان و تەواوى ئەو هەنگاوانەى پێویستن لە چوارچێوەى دەستوور بە ئاڕاستەى چارەسەرکردن و هاوئاهەنگیى هەردوولا بهاوێژرێن.