بەڕێوەبەری گشتیی پەروەردەی سلێمانی لە سەردانێکیدا بۆ قوتابخانەی قەرەگۆل لە شارەزوور، پلانی نۆژەنکردنەوەی بیناکە و پاراستنی لە مەترسیی لافاو ڕادەگەیەنێت.
نەژاد عەبدوڵا، بەڕێوەبەری گشتیی پەروەردەی سلێمانی، سەردانی قوتابخانەی قەرەگۆلی تێکەڵاوی لە ناوچەی شارەزوور کرد. ئەم سەردانە دوای ئەوە دێت کە لە ماوەی ڕابردوودا بەهۆی دروستبوونی لافاوەوە، بەشێک لە دیواری خوێندنگەکە زیانی پێگەیشت و ڕووخا.
بەڕێوەبەری گشتیی پەروەردەی سلێمانی ڕایگەیاند، لەگەڵ لایەنە پەیوەندیدارەکان کاردەکەن بۆ گۆڕینی ڕێڕەوی ئەو ئاوەی دەبێتە هۆی دروستبوونی لافاو لە ناوچەکەدا. ئاماژەی بەوەش کرد کە پڕۆسەی نۆژەنکردنەوەی خوێندنگەکە دەستپێدەکات بۆ ئەوەی لە مەترسییەکانی داهاتوو بپارێزرێت.
نەژاد عەبدوڵا بۆ ڕۆژنامەوانان ڕوونی کردەوە کە بەشێک لە بینای خوێندنگەکە لە ئێستادا مەترسیی ڕووخانی لەسەرە. هەروەها ئاشکرای کرد کە ڕێکخراوێک ئامادەیی نیشانداوە و بەرپرسیارێتیی نۆژەنکردنەوەی تەواوی بیناکەی گرتووەتە ئەستۆ.
لە کۆتایی لێدوانەکەیدا، بەڕێوەبەری گشتیی پەروەردەی سلێمانی ئاماژەی بەوە کرد، ئەگەر لەم قۆناغەدا سیستەمی خوێندن بە شێوەی ئۆنلاین نەبووایە، بەهۆی مەترسییەکانی سەر بیناکە، ناچار دەبوون دەوامی فەرمیی خوێندکاران لەو قوتابخانەیە ڕابگرن.
.jpg)
