بەڕێوەبەری گشتی ڕێکخراوی تەندروستیی جیهانی ڕایگەیاند، ئەو وڵاتانەی دراوسێی کۆنگۆن لە مەترسییەکی گەورەی بڵاوبوونەوەی ئیبۆلادان و پێویستە بەپەلە ڕێکاری پێویست بگرنەبەر.

وڵاتانی هاوسنوری گۆنگۆ مەترسییان لەسەرە

تێدرۆس ئەدهانۆم، بەڕێوەبەری گشتیی ڕێکخراوی تەندروستیی جیهانی وتی: "ئەو وڵاتانەی هاوسنوورن لەگەڵ کۆنگۆ لە مەترسییەکی زۆردان و دەبێت دەستبەجێ هەنگاو بنێن بۆ بەرەنگاربوونەوەی ڤایرۆسەکە".

بڵابوونەوەی نەخۆشی ئیبۆلا بە خێرایی ڕوودەدات

ئەدهانۆم لە کۆبوونەوەیەکی ئۆنڵایندا لە جنێڤەوە وتی: "بڵاوبوونەوەکە بە خێرایی ڕوودەدات و بەپەلە کارەکانمان فراوانتر دەکەین" و ڕایگەیاند ڕۆژی سێشەممە سەردانی کۆنگۆ دەکات کە ناوەندی سەرەکیی بڵاوبوونەوەی ئێستای ئەم نەخۆشییەیە.

ڤاکسنی دژە ئیبۆلا نییە

ئەدهانۆم ئاماژەی بەوەش کرد کە تاوەکو ئێستا "هیچ ڤاکسین و چارەسەرێکی پەسەندکراو" نییە بۆ ئەم جۆرەی دەگمەنەی ئیبۆلا.

10 وڵاتی دیکەی ئەفریقا مەترسی ڤایرۆسەکەیان لەسەرە

ئاژانسی تەندروستیی یەکێتیی ئەفریقا، ڕۆژی شەممە هۆشداریی دا کە جگە لە کۆنگۆ و ئۆگەندا، 10 وڵاتی دیکەی ئەفریقا لە مەترسیی تووشبوون بە ڤایرۆسی ئیبۆلادان.

100 حاڵەتی مردنی گوماناوی تۆمارکراوە

ڤایرۆسە کوشندەکە تەنگی بە کۆنگۆ هەڵچنیوە، وەزارەتی تەندروستیی ئەو وڵاتە ڕایگەیاند نزیکەی 900 حاڵەتی تووشبونی گوماناوی و زیاتر لە 100 حاڵەتی مردنی گوماناوی بە ئیبۆلا تۆمارکراون.