ئەحمەد مام ڕەسوڵ، بەڕێوەبەری کاروباری زیندانییانی سیاسی ، بە کەناڵ8ـی ڕاگەیاند، لەگەڵ سەرۆککۆمارى عێراق کۆبووینەوە و پاڵپشتى گواستنەوەى دۆسییەى زیندانیانى سیاسى هەرێمى کوردستان بۆ بەغداد دەکات تا مینحەکانیان هاوتاى زیندانیانى سیاسیی عێراق بکرێت.

پێشوازیکردنی سەرۆککۆمار لە وەزری کاروباری شەهیدان و ئەنفالکراوانی هەرێمی کوردستان

بەگوێرەى ڕاگەیەندراوى سەرۆکایەتى کۆمار، ئەمڕۆ دووشەممە 29ـى حوزەیران نزار ئامێدی سەرۆککۆمارى عێراق لەکۆشکی بەغداد پێشوازیکرد لەعەبدوڵڵای حاجی مەحموود، وەزیری کاروباری شەهیدان و ئەنفالکراوانی حکومەتی هەرێمی کوردستان.

جەختکردنەوە لە پاراستنی مافەکانی زیندانیانی سیاسی

لە کۆبوونەوەکەدا باسیان لە هەوڵەکانی پاراستنی مافەکانی زیندانیانی سیاسی و بەرز ڕاگرتنی قوربانییەکانیان کردووە . سەرۆک کۆمار جەختیکردووەتەوە، لە گرنگیدان بەپێداویستییەکانی ئەم توێژەی کۆمەڵگە ودوپاتیشیکردەوە، کەچاودێریکردنی خێزانەکانیان بەرپرسیارێتییەکی نیشتمانییە و پێویستی بەهەوڵی هاوبەشی حکومەتی فیدراڵی و حکومەتی هەرێمى کوردستان هەیە.

پاڵپشتی هەوڵ و هەنگاوەکانی زیندانیانی سیاسی و کەسوکاری ئەنفالکراوان

لەبارەى کۆبوونەوەکەوە، ئەحمەد مام ڕەسوڵ ، بەڕێوەبەری کاروباری زیندانییانی سیاسی ، بە کەناڵ8ـی ڕاگەیاند، سەرۆککۆمارى عێراق سەرەڕاى ئەوەى پاڵپشتى مافى زیندانیانى سیاسى و کەسوکارى ئەنفالکراوانە، هاوکات پاڵپشتى هەنگاوەى گواستنەوەى دۆسییەى زیندانیانى سیاسی بۆ سەر دەستەى زیندانییانى سیاسى عێراق کرد.

هەوڵدان بۆ ئەوەی لە بودجەی ساڵی داهاتوو جێی بکرێتەوە

گوتیشى" سەرۆککۆمار لەگەڵ سەرۆکوەزیرانى عێراق و وەزیرى دارایی عێراق لەبارەى گواستنەوەى دۆسییەى زیندانیانى سیاسى گفتوگۆى کردووە تاوەکو لە بودجەى ساڵى 2027 تەرخانى دارایی بۆ زیندانیانى سیاسیی هەرێمى کوردستان دابین بکرێت".

بەرزنرخاندنی هەنگاوەکانی سەرۆککۆمار

ئەوەشى دووپاتکردەوە، پاڵپشتى و هەنگاوەکانى سەرۆککۆمار بەرزدەنرخێنین کە ماف و شایستەى دارایی زیندانیانى سیاسیی هەرێمى کوردستان و سەرجەم ئەوانەى قوربانیان داوە پارێزراو بێت.

ئەمە لەکاتێکدایە، ئێوارەى ڕۆژى شەممە وەزیرى شەهیدیان و کاروبارى ئەنفالکراوان، لەگەڵ بەڕێوەبەرى خزمەتگوزارى کاروباری زیندانییانی سیاسی و ڕزگاربووانی ئەنفال چوونە بەغداد و دۆسییەى 25 هەزار و 868 زیندانى سیاسییان گەیاندە دەستەى زیندانیانى سیاسى عێراق تا مینحەکانیان هاوتاى بەغداد بکرێت.