بەگوێرەی داتاکانی خودی حکومەتی هەرێمی کوردستان، لە کابینەی نۆیەمدا جیاوازییەکی بەرچاو لە تەرخانکردنی بودجە بۆ پڕۆژە خزمەتگوزارییەکان لەنێوان شارەکاندا هەبووە، بەشێوەیەک زۆرینەی بودجەکە بۆ سنووری هەولێر و دهۆک بووە.

داتاکانی سنووری هەولێر و دهۆک

بەپشتبەستن بە نامیلکەی "پوختەیەک لە پڕۆژەکانی کابینەی 9 بە داتا" کە لەلایەن فەرمانگەی میدیا و زانیاریی حکومەتی هەرێمی کوردستانەوە بڵاوکراوەتەوە، لەم کابینەیەدا بڕی 4,263,700,000,000 (چوار تریلیۆن و 263 ملیار و 700 ملیۆن) دینار بۆ پڕۆژەکانی سنووری هەولێر، دهۆک، سۆران و زاخۆ خەرج کراوە. ئەم بڕە پارەیەش 67.48%ـی کۆی گشتیی ئەو بودجەیە پێکدەهێنێت کە بۆ پڕۆژەکان تەرخان کراوە.

داتاکانی سنووری سلێمانی و هەڵەبجە

لە بەرامبەردا، بۆ پڕۆژەکانی سنووری پارێزگاکانی سلێمانی و هەڵەبجە و ئیدارەکانی ڕاپەڕین و گەرمیان، بڕی 2,055,800,000,000 (دوو تریلیۆن و 55 ملیار و 800 ملیۆن) دینار خەرج کراوە. ئەم بڕە پارەیەش تەنیا 32.52%ـی کۆی گشتیی خەرجیی پڕۆژەکانە لە هەردوو سنوورەکەدا، کە جیاوازییەکی زۆر لەگەڵ ناوچەکانی دیکە نیشان دەدات.

کۆی گشتیی خەرجییەکان و تێبینییەکان

بەپێی داتا فەرمییەکان، کۆی گشتیی پارەی خەرجکراو بۆ پڕۆژەکان لە هەردوو سنوورەکەدا گەیشتووەتە 6,318,800,000,000 (شەش تریلیۆن و 318 ملیار و 800 ملیۆن) دینار. ئەم ئامارانە دەیسەلمێنن کە کابینەی نۆیەم لە جێبەجێکردنی پڕۆژەکان و دابەشکردنی بودجەدا جیاوازیی لەنێوان پارێزگاکاندا کردووە و بە یەک چاو تەماشای هەموو شارەکانی نەکردووە، بەڵکو پارەیەکەی زۆر کەمتری بۆ سنووری سلێمانی و دەوروبەری خەرج کردووە.