بەڕێوەبەری پڕۆژەی بەرەنگاربوونەوەی گەندەڵیی نەتەوە یەکگرتووەکان ستایشی هەنگاوەکانی حکومەتی عێراق دەکات بۆ گەڕاندنەوەی پارە دزراوەکان و ڕایدەگەیەنێت، پڕۆسەکە چووەتە قۆناغێکی نوێ و جددییەوە.

هەڵسەنگاندنی نەتەوە یەکگرتووەکان بۆ دۆخی عێراق

یاما تورانی، بەڕێوەبەری پڕۆژەی بەرەنگاربوونەوەی گەندەڵی و پتەوکردنی حکومڕانی لە بەرنامەی نەتەوە یەکگرتووەکان ڕایگەیاند، عێراق لە دۆسیەی بەرەنگاربوونەوەی گەندەڵیدا بازدانێکی جۆری ئەنجامداوە. ئاماژەی بەوەش کرد کە حکومەتی عێراق هەنگاوی زۆر جددی و توندی گرتووەتەبەر، بەتایبەتی لە بابەتی بەدواداچوون بۆ گەڕاندنەوەی ماڵ و سامانە دزراوەکان.

پڕکردنەوەی بۆشاییە ئیداری و یاساییەکان

بەڕێوەبەرەکەی نەتەوە یەکگرتووەکان جەختی لەوە کردەوە کە عێراق دەتوانێت دۆسیەکان باشتر بەڕێوەببات لە ڕێگەی دیاریکردنی وردی زیانەکان و ژمارەی ئەو سکاڵا مەدەنییانەی کە هەن. هەروەها ئاماژەی بە پێویستیی دەستنیشانکردنی هەڵە ئیدارییەکان کرد و داوای کرد دۆسیەکانی گەندەڵی بە شێوەیەک یەکلا بکرێنەوە کە پلەی کۆتایی وەربگرن و سزا کانیان جێبەجێ بکرێت.

ستراتیژیی نیشتمانی بۆ دەستپاکی

لەلایەکی دیکەوە، عەبدوڵا دەردەری، بەڕێوەبەری نووسینگەی هەرێمی بۆ وڵاتانی عەرەبی لە نەتەوە یەکگرتووەکان ئاشکرای کرد، لە ماوەی 10 ساڵی ڕابردوودا بەرنامەکانیان کاریان کردووە بۆ پاڵپشتیکردنی دامەزراوەکانی دەوڵەتی عێراق. ئەم هەماهەنگییە لە پێناو داڕشتنی ستراتیژییەکی نیشتمانی بووە بۆ دەستپاکی و بەرەنگاربوونەوەی گەندەڵی.

چاکسازیی یاسایی و کەمکردنەوەی گەندەڵی

بەپێی زانیارییەکانی نەتەوە یەکگرتووەکان، کارکردن بۆ چاکسازیی یاسایی یەکێک بووە لە کارە لەپێشینەکان بۆ کەمکردنەوەی ئاستی گەندەڵی لە عێراقدا. نەتەوە یەکگرتووەکان بەردەوامە لە هاوکاریکردنی بەغداد بۆ ئەوەی دامەزراوەکان بەهێزتر بکرێن و شەفافیەت لە خەرجییە گشتییەکاندا زیاتر بێت.