قالیباف و فایەق زێدان پەرەپێدانی هاوکارییە دادوەرییەکانیان تاوتوێ کرد
پووختەی هەواڵەکە:
- سەرۆکی ئەنجوومەنی دادوەریی عێراق و سەرۆکی پەرلەمانی ئێران لە بەغدا کۆبوونەوە.
- هەردوولا باسیان لە جێبەجێکردنی ئەو ڕێککەوتننامە دادوەرییانە کرد کە پێشتر واژۆ کراون.
- کۆبوونەوەکە بەشێکە لە سەردانی فەرمیی شاندە ئێرانییەکە بۆ تاوتوێکردنی دۆسیە ئەمنی و سیاسییەکان.
بەگوێرەی راگەیەندراوێکی ئەنجوومەنی باڵای دادوەریی عێراق تاران و بەغداد کار بۆ کاراکردنی ڕێککەوتننامە دادوەرییەکان دەکەن بۆ یەکلاکردنەوەی چەندین دۆسیەی یاسایی، ئەمەش هاوکاتە لەگەڵ هەوڵە دیپلۆماسییەکان بۆ هێورکردنەوەی ئاڵۆزییەکان و ڕێکخستنەوەی پێگەی گروپە چەکدارەکان لە عێراقدا.
فایەق زێدان و ئەنجوومەنی دادوەری:
- پێشوازی لە سەرۆکی پەرلەمانی ئێران و شاندی یاوەری کرد بە مەبەستی بەهێزکردنی پەیوەندییە دووقۆڵییەکان.
- جەختی لەسەر بەرزکردنەوەی ئاستی هاوکارییەکانی نێوان بەغداد و تاران لە بوارە دادوەری و یاساییەکاندا کردەوە.
- بەدواداچوونی وردی بۆ هەنگاوەکانی جێبەجێکردنی ئەو یاداشتنامانە کرد کە پێشتر لە نێوان هەردوو وڵاتدا ئیمزا کراون.
محەمەد باقر قالیباف و حکومەتی عێراق:
قالیباف کە لە 19ی ئابی 2026 گەیشتووەتە بەغداد، جگە لە دەسەڵاتی دادوەری، لەگەڵ عەلی زەیدی، سەرۆکوەزیرانی عێراق کۆبووەوە. بڕیارە لەگەڵ سەرکردەکانی چوارچێوەی هەماهەنگی پرسی چەکدانانی گروپە چەکدارەکان و پاراستنی سەقامگیریی وڵات تاوتوێ بکات، کە یەکێکە لە گرنگترین تەوەرەکانی سەردانەکەی بۆ بەغداد.
زانیاریی لەسەر سەردانەکە:
ئەم سەردانە فەرمییەی قالیباف دوای پێشوازیکردنی لەلایەن عەدنان فەیحان، جێگری سەرۆکی پەرلەمانی عێراق دەستیپێکرد. تاران دەیەوێت لە ڕێگەی ئەم گفتوگۆیانەوە دڵنیایی وەربگرێت لە پاراستنی بەرژەوەندییە یاسایی و سیاسییەکانی لە عێراقدا، هاوکات هەوڵدەدات وەک لایەنێکی ناوبژیوان لە نێوان حکومەت و لایەنە شیعەکاندا دەربکەوێت.
زانیاری زیاتر بۆ تۆ
