قالیباف لە عێراقەوە بە وێنەیەک پەیامی سیاسی دەنێرێت
پووختەی هەواڵەکە:
- وێنەکەی لە هەژماری خۆی لە پلاتفۆڕمی ئێکس بڵاوکردووەتەوە
- دانیشتن لەسەر کورسییەکی لێوار زێڕین
- لەسەر نەخشەکەی پشتییەوە نوسراوە کەنداوی عەرەبی و کەنداوی فارس
لە کاتێکدا لە بەغدا بوو، محەممەد باقر قالیباف، وێنەیەکی خۆی بڵاوکردەوە کە لە پشتییەوە گەرووی هوورمز، کەنداوی عەرەب و دەریای عوممان دەردەکەون و وادەردەکەوێت لە ڕێگەیەوە کۆمەڵێک پەیامی سیاسیی و ئەمنیی ناردووە.
قالیباف، کە ڕۆژی چوارشەممە گەیشتە بەغداد، لە هەژماری خۆی لە پلاتفۆرمی کۆمەڵایەتیی ئێکس، وێنەیەکی بڵاوکردووەتەوە.
لە وێنەکەدا لەسەر کورسییەکی کلاسیکی لێوار زێڕین دانیشتووە و چاکەتێکی ڕەش و کراسێکى شینی لەبەردایە، کە ئاماژەیە بە کەسایەتییەکی سیاسی، فەرمی، کلاسیکی و دەسەڵاتدار.
لە پشتی قالیبافەوە نەخشەیەک هەڵواسراوە، لەسەرى نووسراوە کەنداوی عەرەبی، کەنداوی فارس و لە لاکەی دیکەی نەخشەکە کەنداوی عوممان دەرکەوتووە.
پەیامی وێنەکە لەسەر گەرووی هورمز
- قالیباف سەری بە تەواوی لەسەر گەرووی هورمز داناوە
- ئەو گەرووە دەریاییەی کە نزیکەی شەش مانگە جیهانی بێ وزە کردووە
- قالیباف چەند جارێک کردنەوەی گەرووی هورمزی بەستووەتەوە بە لابردنی گەمارۆکان و ئاگربەستی گشتگیر
سەری قالیباف بە تەواوی کەوتووەتە سەر گەرووی هوورمز؛ ئەو گەرووەی نزیکەی شەش مانگە، جیهانی بەبێ وزە کردووە و بەهۆی داخستنییەوە، ئابووریی جیهانی هەناسەسوار کردووە و قالیبافیش چەند جارێکى گوتویەتى بەبێ لابردنى گەمارۆکان، ئازادکردنى پارە بلۆککراوەکان و ئاگربەستى گشتگیر و جێبەجێکردنى یاداشتەکە، گەرووەکە ناکرێتەوە.
گەیاندنی پەیام بە وێنە
سەری قالیباف ئاوەکانی عوممانی لە کەنداوی عەرەبی دابڕیوە و بە تەواوی کەوتووەتە سەر گەرووی هوورمز، ئەوەش ئاماژەیە بەو پەیامەی قالیباف، کە کۆنترۆڵی گەرووەکە لەژێر دەستی وڵاتەکەدایە و تەنیا بە لێکردنەوەی سەری ئێران، ئەو گەرووە لەژێر دەستی تاران دەردەچێت. هەر بۆیە سەریان لەپێناو ئەو گەرووەدا دادەنێن.
لەگەڵ ئەوەی قالیباف خەندەیەکی شاراوە و بزەیەک لەسەر لێویەتی، بەڵام بەکارهێنانی چاویلکە پزیشکییەکەی، وای کردووە جددیەتی خۆی بپارێزێت.
ئەوەی جێگەی سەرنجە قالیباف لە عێراقەوە وێنەکەی داناوە
ئەوەی زۆر مایەی سەرنجە، قالیباف لە عێراقەوە وێنەکەی داناوە و لەسەر نەخشەکە کەنداوی عەرەب بە کەنداوی فارس نووسراوە، لە کاتێکدا ئەو کەنداوە لای عێراق و وڵاتانی ناوچەکە و جیهان، کەنداوی عەرەبە.
بۆ ئەوەی پەیامەکە بۆ ئەمریکا و جیهان بێت، بە ئینگلیزش نووسراوە کەنداوی فارس.
قالیباف لەو سەرکردانەی ئێرانە، کە زۆر جار بە ژمارە، خوازە، سیمبول، وێنە و گوزارشتی ناڕاستەوخۆ پەیامە سیاسییەکانی دەگەیێنێت.
زانیاری زیاتر بۆ تۆ
سەرۆککۆمار و سەرۆکی پەرلەمانی ئێران لە بەغداد کۆبوونەوە
قالیباف لە بەغداد: خوێنی ئێران و عێراق پێکەوە تێکەڵ بووە
ئێران: تاوەکو گەمارۆکان هەڵنەگیرێن گەرووی هوورمز ناکرێتەوە
ئێران هۆشداری بە وڵاتانی ناوچەکە دەدات
ئیمارات سەرجەم چالاکییە بازرگانیی و داراییەکانی لەگەڵ ئێران ڕاگرت
2 کاتژمێر پێش ئێستا