دەستەى دەستپاکى فیدڕاڵى: کارەسات لە تۆمارى خانەنشیناندا هەیە
پووختەى هەواڵەکە
- دەستەى دەستپاکى عێراق: زیاتر لە 16 هەزار خانەنشین کۆچى دواییان کردووە و مووچەکانیان وەردەگیرێت.
- ناوى دووبارە و ناوى وەهمى لە تۆمارى خانەنشینان هەیە.
- چەندین کەس بەشەهید هەژمارکراون و شەهید نەبوون.
- بەشێک لە بەڕێوەبەرایەتییەکانى خانەنشینى لە گەندەڵییەوە گلاون.
بە گوێرەى ڕاپۆرتێکی دەستەى دەستپاکى عێراق، پاش پێکهێنانی لیژنەیەکی تایبەت بۆ پێداچوونەوە بە تۆماری خانەنشینان بە فەرمانی عەلی زەیدی، سەرپێچی گەورە لە چەند پارێزگایەکدا ئاشکرا بوون. دەستەکە ئاماژەی بەوە کردووە کە قەبارەی سەرپێچییەکان گەیشتووەتە ئاستی "کارەسات".
بە گوێرەى لێکۆڵینەوەکانى دەستەکە
- مووچەی زیاتر لە16 هەزار خانەنشینی کۆچکردوو هێشتا بە نایاسایی خەرج دەکرێت و لەلایەن کەسانی دیکەوە وەردەگیرێت.
- بە تەنیا لە پارێزگای ئەنبار، لیژنەکە توانیویەتی19 هەزار دۆسیەی خانەنشینی ساختە و نایاسایی ئاشکرا بکات.
- لە کۆی پێداچوونەوە بە دۆسیەی102 هەزار و 867 شەهیدی قوربانیی تیرۆر لە نەینەوا، دەرکەوتووە بەشێکی زۆریان بە ناشایستە پارەیان بۆ خەرج کراوە و لە بنەڕەتدا شەهید نەبوون.
داواکارییەکانى دامەزراوەى شەهیدان و ڕاپۆرتەکانى دەستەى دەستپاکى
دامەزراوەی شەهیدان لە ساڵی 2022ـەوە داوای ڕاگرتنی مووچەی ئەو بەشە ناشایستەیەی کردووە، بەڵام بەڕێوەبەرایەتیی گشتیی خانەنشینی داواکارییەکەی پشتگوێخستووە.
سەرەڕای ئەوەی وەزارەتی ناوخۆ بەڵگەی وردی لەسەر تێوەگلانی بەشێک لە بەڕێوەبەرایەتییەکانی خانەنشینی لە کێشە و گەندەڵییەکاندا ناردووە، بەڵام هیچ کارێکی پێشوەختە لەسەر ئەو زانیارییانە نەکراوە.
دەستەی دەستپاکی هۆکاری سەرەکیی ئەم بەهەدەردانە گەورەیەی بۆ نەبوونی چاودێریی ورد و لاوازیی هەماهەنگی لە نێوان دامەزراوەی شەهیدان و دەستەی گشتیی خانەنشینیدا گەڕاندووەتەوە.
ڕاپۆرتەکەى دەستەى دەستپاکى، دامەزراوەى شەهیدان تۆمەتبار دەکات بەوەى کە هەڵە و کەموکوڕى زۆر لە لیستى شەهیدان هەیە بەتایبەت لەو پارێزگایانەى دەستى تیرۆرى پێگەیشت و دەڵێت، لە لیستەکاندا کەسانى ناشایستە و ناوى وەهمى هەیە و کراون بە شەهیدى دەستى تیرۆر و مووچە وەردەگیرێن.
