فایەق زێدان بە سەرۆکایەتیی شاندێکی باڵا گەیشتە تاران
پووختەی هەواڵەکە:
- سەرۆکی ئەنجوومەنی باڵای دادوەریی عێراق بە سەردانێکی فەرمی گەیشتە تاران.
- شاندێکی باڵای یاسایی و دادوەری یاوەری دکتۆر فایەق زێدان دەکەن.
- سەردانەکە لەسەر بانگهێشتی فەرمی دەسەڵاتی دادوەریی کۆماری ئیسلامیی ئێرانە.
- جێگری سەرۆکی دەسەڵاتی دادوەریی ئێران لە تاران پێشوازی لە شاندەکە کرد.
بەرزترین ئاستی دەسەڵاتی دادوەریی عێراق بۆ یەکلاکردنەوەی کۆمەڵێک دۆسیەی یاسایی گەیشتووەتە تاران. دکتۆر فایەق زێدان لەم گەشتەیدا دەیەوێت هەماهەنگییەکانی نێوان هەردوو وڵات لە بواری دادوەری و ڕادەستکردنەوەی تۆمەتباران بەهێزتر بکات. ئەم سەردانە فەرمییە لە ڕێکەوتی 25 / 8 / 2026 دەستیپێکردووە و ئامانجی پەرەپێدانی پەیوەندییە یاساییەکانی نێوان بەغداد و تارانە.
پێکهاتەی شاندە عێراقییەکە
- شاندەکە لە لایەن دکتۆر فایەق زێدان، سەرۆکی ئەنجوومەنی باڵای دادوەرییەوە سەرۆکایەتی دەکرێت.
- سەرۆکی دەستەی سەرپەرشتیاری دادوەری و سەرۆکی دەزگای داواکاری گشتی لە ناو شاندەکەدان.
- بەڕێوەبەری گشتیی فەرمانگەی پاسەوانیی دادوەری بەشێکە لەو تیمە باڵایەی سەردانی ئێرانیان کردووە.
پێشوازیی لایەنی ئێرانی
لە تاران، ناسر سەراج، جێگری سەرۆکی دەسەڵاتی دادوەری بۆ کاروباری نێودەوڵەتی، پێشوازی لە شاندە عێراقییەکە کرد. ناسر سەراج کە هاوکات ئەمینداری دەستەی مافەکانی مرۆڤە لە دەسەڵاتی دادوەریی ئێران، جەختی لە گرنگیی پەرەپێدانی دیپلۆماسیی دادوەری لە نێوان هەردوو وڵاتدا کردەوە. بڕیارە لە کۆبوونەوەکاندا باس لە هاریکارییە یاساییەکان و دۆسیە هاوبەشە ئەمنییەکانی نێوان بەغداد و تاران بکرێت.
زانیاری زیاتر بۆ تۆ
قالیباف و فایەق زێدان پەرەپێدانی هاوکارییە دادوەرییەکانیان تاوتوێ کرد
