ڕێبەر ئەحمەد: کشانەوەی هێزەکانی هاوپەیمانان لە هەرێمی کوردستان بە کرداری دەستیپێکردووە
پووختەى هەواڵەکە
- وەزیری ناوخۆ ڕایگەیاند کشانەوەی هێزەکانی هاوپەیمانیی نێودەوڵەتی لە هەرێمی کوردستان بە کرداری دەستیپێکردووە.
- هێزەکان بەر لە وادەی 30ـی ئەیلوول بەرەو شوێنی دیکە لە دەرەوەی عێراق دەگوازرێنەوە.
- هەرێمی کوردستان و بەغداد پلانی هاوبەشی ئەمنی دادەنێن بۆ ڕێگری لە دروستبوونی بۆشایی لە دوای کشانەوەکە.
- بەشێک لە کۆمپانیا نەوتییەکان بەهۆی دابیننەکردنی سیستمی دژە درۆن نەکەوتوونەتەوە کار.
پڕۆسەی کشانەوەی کرداریی هێزەکانی هاوپەیمانیی نێودەوڵەتی لە هەرێمی کوردستان دەستیپێکردووە و سەربازەکان بەرەو بنکەکانی دەرەوەی عێراق دەگوازرێنەوە. لە کاتێکدا مەترسیی دروستبوونی بۆشایی ئەمنی لە دوای 30ـی ئەیلوول لە ئارادایە، هەولێر و بەغداد هەماهەنگییە هەواڵگری و سەربازییەکانیان چڕکردووەتەوە، هاوکات کۆمپانیا نەوتییەکانیش بەهۆی نەبوونی سیستمی بەرگریی دژە درۆن بە تەواوی نەکەوتوونەتەوە کار.
کشانەوەی هاوپەیمانان و هەماهەنگیی ئەمنی لەگەڵ بەغداد
- کشانەوەی هێزەکانی هاوپەیمانان بەپێی ڕێککەوتنی پێشوەختەیە لەگەڵ حکومەتی عێراق و سەربازەکان بەرەو دەرەوەی وڵات دەگوازرێنەوە.
- پێویستە عێراق پەیوەندیی دوولایەنە لەگەڵ ئەو وڵاتانە دروستبکات کە بەشداربوون لە هاوپەیمانێتییەکەدا، چونکە ئاسایش دابەشناکرێت و هێشتا وڵات پێویستی بە هاوکاریی لایەنە دۆستەکانە.
- سەردانی سەرۆکی دەزگای دژەتیرۆری عێراق بۆ هەرێمی کوردستان بە مەبەستی تاوتوێکردنی ئاڵنگارییەکان و داڕشتنی پلانی هاوبەش بووە بۆ ڕاهێنان و چالاکیی هاوبەشی دژ بە تیرۆر.
- کشانەوەی هێزەکان نابێت ببێتە هۆی لاوازبوونی ئارامی، بەڵکو دەبێت کاری هاوبەشی نێوان دامەزراوە ئەمنییەکانی هەرێم و فیدراڵ بەهێزتر بکرێت.
کەرتی نەوت و سەروەریی وڵات لەژێر ئیدارەی زەیدیدا
وەزیری ناوخۆ ئاماژەی بەوە کرد کە حکومەتی هەرێمی کوردستان پاڵپشتی لە هەوڵەکانی عەلی زەیدی سەرۆکوەزیرانی عێراق دەکات بۆ گەڕاندنەوەی سەروەری و سەربەخۆیی بڕیاری سیاسی؛ لە هەمان کاتدا ڕوونیکردەوە کە بەشێک لە کۆمپانیا نەوتییەکان لە هەرێمی کوردستان بەهۆی نەبوونی گرەنتیی ئەمنی و دانەنانی سیستمی بەرگریی ئاسمانی دژی مووشەک و درۆن بە تەواوی نەکەوتوونەتەوە کار، بەڵام بەرهەمهێنانی سنووردار بەردەوامە و نەوت دەدرێتە بازاڕەکان.
زانیاری زیاتر بۆ تۆ
1 کاتژمێر پێش ئێستا