پووختەی هەواڵەکە:

• عەلى زەیدى سەردانى فەڕەنسا و ئەڵمانیا دەکات

• عەلى زەیدى ژمارەیەک یاداشتى لێکتێگەیشتن لەگەڵ فەڕەنسا و ئەڵمانیا واژۆدەکات

• لەسەر بانگێشتیی فەرمیی هەردوو وڵات، عەلى زەیدى سەرۆکوەزیرانى عێراق، سەردانى پاریس و بەرلین دەکات.

---

عەلى زەیدى، سەرۆکوەزیرانى عێراق، بە سەرۆکایەتیی شاندێکى باڵا، سەردانى ئەڵمانیا و فەڕەنسا دەکات، بڕیارە لە سەردانەکەدا، چەندین یاداشتی لێکتێگەیشتن لە بوارەکانی وزە و ئاسایش و گواستنەوە و پەروەردە و خوێندنی باڵا و کولتوور لەگەڵ هەردوو وڵات واژۆ بکات.

---

ڕاگەیێنراوی فەرمی لەسەر گەشتەی زەیدی بۆ ئەوروپا

• سەردانەکە بەشێکە لە هەوڵەکانى حکومەت بۆ پەرەپێدانى پەیوەندییە نێودەوڵەتییەکان.

• سەردانەکەی زەیدی هەوڵێکە بۆ ڕەخساندنى ئاسۆى فراوانتر بۆ هاوبەشى لەگەڵ هەردوو حکومەتى فەڕەنسى و ئەڵمانى، بەتایبەت لە بوارەکانى وزە، ئاسایش، گواستنەوە و بوارەکانى دیکە.

• تاوتوێکردنی ڕێگەکانی بەهێزکردنی هاوبەشییە ئابوورییەکان لەگەڵ هەردوو لایەنى فەڕەنسى و ئەڵمانى لە سایەی ئاڵنگارییەکانی ئێستای ناوچەکە و جیهان.

• چەندین یاداشتی لێکتێگەیشتن لە بوارەکانی وزە، ئاسایش، گواستنەوە، پەروەردە، خوێندنی باڵا و کولتوور واژۆدەکرێن.

حەیدەر عەبوودى، گوتەبێژى حکومەتى عێراق ڕایگەیاند، لەسەر بانگێشتیی فەرمیی هەردوو وڵات، عەلى زەیدى سەرۆکوەزیرانى عێراق، سەردانى پاریس و بەرلین دەکات، سەردانەکە بەشێکە لە هەوڵەکانى حکومەت بۆ پەرەپێدانى پەیوەندییە نێودەوڵەتییەکان و ڕەخساندنى ئاسۆى فراوانتر بۆ هاوبەشى لەگەڵ هەردوو حکومەتى فەڕەنسى و ئەڵمانى، بەتایبەت لە بوارەکانى وزە، ئاسایش، گواستنەوە و بوارەکانى دیکە.

بڕیارە زەیدی لەگەل ماکرۆن و فرێدریش مێرتز کۆبێتەوە

بڕیارە زەیدى لەگەڵ ئیمانوێل ماکرۆن، سەرۆکى فەڕەنسا و فرێدریش مێرتز، ڕاوێژکارى ئەڵمانیا کۆببێتەوە و ژمارەیەک دۆسییە و پرسى ناوچەیی و نێودەوڵەتیی جێى بایەخى هاوبەش تاوتوێ بکەن.

سەرۆکایەتیکردنی شاندی عێراق بۆ دانوستان لەگەڵ لایەنی فەرەنسی و ئەڵمانی

هەروەها زەیدى، سەرۆکایەتیی شاندى عێراق دەکات، لە دانوستانەکاندا لەگەڵ هەردوو لایەنى فەڕەنسى و ئەڵمانى بۆ تاوتوێکردنی ڕێگەکانی بەهێزکردنی هاوبەشییە ئابوورییەکان لە سایەی ئاڵنگارییەکانی ئێستای ناوچەکە و جیهان،
هاوکات چەندین یاداشتی لێکتێگەیشتن لە بوارەکانی وزە، ئاسایش، گواستنەوە، پەروەردە، خوێندنی باڵا و کولتوور واژۆدەکرێن، کە ڕۆڵیان دەبێت لە پتەوکردن و بەهێزکردنی پەیوەندییە دووقۆڵییەکان.

دەروازەیەک بۆ هەماهەنگی و وەبەرهێنان و گەشەپێدان لەگەڵ پاریس و بەرلین

هەروەها عەلى زەیدى، لە پەیامێکی ڤیدیۆییدا لەبارەى سەردانەکەیەوە دەڵێت،"عێراق دەبێت پێگە و ڕۆڵی خۆی بەدەستبهێنێتەوە و پەیوەندییەکانیشی لەسەر بنەمای بەرژەوەندی هاوبەش و هاوبەشییەکی دادپەروەرانە بونیاد بنێت، لەگەڵ پاریسدا دەرگای نوێ دەکەنەوە بۆ هەماهەنگی و وەبەرهێنان و گەشەپێدان، لەگەڵ بەرلینیشدا کار بۆ هاوبەشی لەسەر بنەمای زانیاری و تەکنەلۆجیا و پیشەسازی و بەرژەوەندی هاوبەش دەکەن".

عێراق بە متمانەوە بۆ جیهان دەڕوانێت

زەیدى دەشڵێت، وڵاتەکەی ئێستا بە متمانەوە لە جیهان دەڕوانێت، کار بۆ بونیادنانی هاوبەشی و هاوپەیمانی ڕاستەقینە دەکات بە ئامانجى بەدەستهێنانى هێزێکی ئابووری و گەشەپێدان.

عەلی زەیدی، لە ئایاری 2026 دەستبەکار بووە، لە ڕۆژانى 13، و 23، و 28ـى تەمموز سەردانى ئەمریکا، ئێران و تورکیاى کرد.

زانیاری زیاتر بۆ تۆ

زەیدی: لەگەڵ پاریس و بەرلین دەرگای نوێی وەبەرهێنان دەکەینەوە

کۆشکی ئیلیزێ وردەکاریی سەردانەکەی سەرۆکوەزیرانی عێراق بۆ پاریس ئاشکرادەکات

سبەی سەرۆکوەزیرانی عێراق سەردانی فەڕەنسا دەکات و لەگەڵ ماکرۆن کۆدەبێتەوە