نەوتی ئێران و چەکدارکردنی تایوان؛ تەوەرە هەرە گەرمەکانی کۆبوونەوەی ترەمپ و سەرۆکی چین

پووختەی هەواڵەکە:

دوای زیاتر لە 10 ساڵ سەرۆکی چین بە سەردانێکی فەرمی 3 ڕۆژە گەیشتە واشنتن.
دۆناڵد ترەمپ پرۆتۆکۆڵی دیپلۆماسیی ئەمریکای شکاند و لە فڕۆکەخانەی سەربازی پێشوازی لە شی جینپینگ کرد.
سەرکردەکانی هەردوو وڵات گفتوگۆ لەسەر دۆسیەکانی تایوان، تەکنەلۆجیا، باجی گومرگی و جەنگی ئێران دەکەن.
گەورە پیاوانی تەکنەلۆجیای ئەمریکا و بەڕێوەبەری کۆمپانیا زەبەلاحەکانی چین بەشداری لە ئێوارەخوانی فەرمیدا دەکەن.

سەردانەکەی شی جینپینگ بۆ ئەمریکا گۆڕانکاریی لە پڕۆتۆکۆڵی نەریتیی کۆشکی سپی دروستکردووە کاتێک دۆناڵد ترەمپ ڕاستەوخۆ چووەتە سەر فەرشی سووری فڕۆکەخانەی سەربازی بۆ پێشوازیکردن لێی. سەرۆکی چین بەشداری لە کۆبوونەوەکانی خولی 81ـی نەتەوە یەکگرتووەکان لە نیویۆرک ناکات و تەواوی مانەوەی بۆ ماوەی 3 ڕۆژ لە واشنتن بۆ یەکلاکردنەوەی ناکۆکییە ئابووری و سەربازییەکان لەگەڵ سەرۆکی ئەمریکا تەرخانکردووە.

تەوەرە سەرەکییەکانی گفتوگۆ و خاڵە ناکۆکەکانی نێوان هەردوو وڵات:

تاوتوێکردنی کەمکردنەوەی بەشێک لە باجە گومرگییەکانی ئەمریکا لەسەر کاڵا ناستراتیجییەکان و پرسی هەناردەکردنی کانزا دەگمەنەکان لەلایەن چینەوە.
کارکردن لەسەر ئەو ڕێککەوتنانەی لە نیویۆرک لەنێوان شاندەکانی هەردوولادا بۆ دیاریکردنی چوارچێوەی دیالۆگ لەسەر ژیریی دەستکرد واژۆ کران.
پرسی تایوان و فرۆشتنی چەکی ئەمریکی بەو دوورگەیە کە بەردەوام سەرچاوەی گرژییە سەربازییەکانی نێوانیان بووە.
تاوتوێکردنی پرسی جەنگی ئێران و خستنەڕووی گوشارەکانی ئەمریکا بۆ سەر پەکین بە مەبەستی سنووردارکردنی کڕینی نەوتی ئێرانی.

پڕۆتۆکۆڵی سەردانەکە، کۆبوونەوەکان و بەشداریی کەرتی تەکنەلۆجیا:

بەرنامەی کاری سەردانەکە لە واشنتن بە مەراسیمی سەربازی لە باخچەی ڕۆز دەستپێدەکات و دواتر بە کۆبوونەوەی فەرمیی نێوان ترەمپ و شی جینپینگ بەردەوام دەبێت. لە ئێوارەخوانێکی فەرمیدا لە کۆشکی سپی، گەورە پیاوانی تەکنەلۆجیای ئەمریکا وەک ئیلۆن مەسک، جێف بێزۆس، سام ئاڵتمان و تیم کوک لەگەڵ بەڕێوەبەرانی کۆمپانیا گەورەکانی چین وەک شیاومی، بی وای دی و کاتڵ بەشدار دەبن. لە ڕۆژی هەینیشدا دوای کۆبوونەوەیەکی خێزانی و سەردانی ئەرشیفی نیشتمانیی ئەمریکا، سەرۆکی چین کۆتایی بە سەردانەکەی دەهێنێت.

چوونی دۆناڵد ترەمپ بۆ پێشوازیکردن لە فڕۆکەخانەی سەربازیی "جۆینت بەیس ئەندرێوس" لە ماریلاند، لە مێژووی سەرۆکایەتیی ئەودا بۆ یەکەمین جارە ڕوودەدات، چونکە بەپێی دابونەریتی دیپلۆماسی، سەرۆکەکانی ئەمریکا تەنیا لە کۆشکی سپی پێشوازی لە میوانە فەرمییەکان دەکەن.

ئەم پرۆتۆکۆڵە پێشتر چەند جارێکی دیاریکراو لە مێژووی ئەمریکادا شکێنراوە؛ ساڵی 1959 کاتێک دوایت ئایزنهاوەر بۆ کەمکردنەوەی گرژییەکانی جەنگی سارد لە فڕۆکەخانە پێشوازی لە نیکیتا خرۆشۆڤ کرد، هەروەها ساڵی 2008 جۆرج دەبلیو بۆش پێشوازی لە پاپا بێندیکتی شانزەیەم کرد، دواتریش لە ساڵی 2015 باراک ئۆباما بە هەمان شێواز پێشوازی لە پاپا فرانسیس و شی جینپینگ کردبوو.

زانیاری زیاتر بۆ تۆ:

سەرۆکی ئەمریکا سەرۆکی چینی بۆ وڵاتەکەی بانگهێشت کرد

ترەمپ: چین گەورەترین پرۆسەى دزەکردنە نێو داتاکانى هەڵبژاردنى ئەنجامداوە