پووختەی هەواڵەکە:

• لە یەکێک لە خوێندنگەکانی سلێمانی قوتابییەکی پۆلی چوارەمی بنەڕەتی گیانی سپارد.

• ڕووداوەکە بەهۆی خۆکێشانی قوتابییەکە بووە بە بەربەستێکی شووشەیی ڕوونی بێ ئاگاداری لە خوێندنگەکەدا.

• باوکی قوتابییەکە ڕایدەگەیەنێت لە نەخۆشخانەی فریاکەوتن هەواڵی گیانلەدەستدانی منداڵەکەی پێدراوە.

• کەسوکاری قوتابییەکە داوا دەکەن لێکۆڵینەوە لە کەمتەرخەمی لە مەرجەکانی سەلامەتیی بینای خوێندنگەکە بکرێت.

---

لە خوێندنگەیەکی شاری سلێمانی ڕووداوێکی گیانلەدەستدانی قوتابییەکی 10 ساڵان بەهۆی بەرکەوتنی بە شووشەی باڵەخانەی خوێندنگەکەی تۆمارکراوە. بەپێی زانیارییەکان، ڕووداوەکە لە کاتی دەوامی فەرمیدا ڕوویداوە کاتێک قوتابییەکە لە کاتی یارییکردندا خۆی کێشاوە بە شووشەیەکی بێ ئاگاداریدا و بەهۆی سەختیی برینەکەیەوە لە نەخۆشخانە گیانیلەدەستداوە.

---

وردەکاریی ڕووداوەکە و وتەکانی باوکی قوتابییەکە بۆ کەناڵ8:

• یارا ئاریان، تەمەن 10 ساڵ، قوتابی پۆلی چوارەمی بنەڕەتی بووە لە خوێندنگەی ڕۆیاڵ کەنەدییان لە سلێمانی.

• باوکی قوتابییەکە ڕایگەیاند لە کاتی گەڕانەوەی لە دەوام لەناو پاسدا پەیوەندییەکی لەلایەن کارگێڕیی خوێندنگەکەوە پێگەیشتووە و پێی ڕاگەیەندراوە کە کچەکەی بەهۆی بەرکەوتنی بە شووشە بریندار بووە.

• باوکی منداڵەکە ئاماژەی بەوە کرد دوای پێداگری لەسەر زانینی دۆخەکە، مامۆستاکە پێی ڕاگەیاندووە کە کچەکەی گیانی سپاردووە و پێویستە بچێتە نەخۆشخانەی فریاکەوتن.

• لە نەخۆشخانەی فریاکەوتن پزیشکان هەواڵی کۆتاییان پێداوە و تەرمی منداڵەکەیان ڕادەستی کەسوکارەکەی کردووەتەوە.

• باوکی یارا جەختی کردەوە شووشەی بیناکە تەواو ڕوون بووە و هیچ هێما یان لەزگەیەکی ئاگادارکەرەوەی پێوە نەبووە تا منداڵان لە کاتی جووڵە و یارییکردندا لێی ئاگادار بن.

هەڵوێستی خێزانەکە و داواکاری بۆ پێداچوونەوە بە مەرجەکانی سەلامەتی:

لە لایەکی دیکەوە سەبارەت بە ڕێکارە یاساییەکان، کەسوکاری قوتابییەکە ئاماژەیان بەوە کردووە سکاڵای تایبەتییان لەسەر هیچ کەسێک نییە، بەڵام داوا دەکەن لایەنە پەیوەندیدارەکان بەدواداچوون بۆ کێشەی کەمتەرخەمی لە سەلامەتیی بیناکەدا بکەن؛ بەجۆرێک ڕێگری لە دووبارەبوونەوەی ڕووداوی لەو شێوەیە بکرێت لە ڕێگەی دانانی نیشانەی ئاگادارکەرەوە و هۆشیارکردنەوە لەسەر دەرگا و بەربەستە شووشەییە ڕوونەکان لە ناوەندەکانی خوێندندا.

بەپێی پێوەرە ئەندازیارییەکان بۆ ناوەندەکانی فێرکردن، بەکارهێنانی شووشەی ڕوون لەو شوێنانەی قوتابیان تێیدا هاتووچۆ و یاری دەکەن، پێویستی بە ڕەچاوکردنی چەندین مەرجی سەلامەتی هەیە، لەوانە بەکارهێنانی شووشەی پارێزراو کە لە کاتی بەرکەوتندا نەبێتە هۆی برینداریی مەترسیدار، شانبەشانی دانانی نیشانەی ڕوون لە ئاستی بینینی منداڵاندا.

زانیاری زیاتر بۆ تۆ:

بەڕێوبەری پەروەردەی سلێمانی: بەدواداچوونی ورد بۆ گیانلەدەستدانی قوتابییە 10 ساڵانەکە دەکەین