خەڵاتی نۆبڵی پزیشکی بە سێ زانا بەخشرا

پووختەى هەواڵەکە

ئەمڕۆ خەڵاتى نۆبڵى پزیشکى دابەشکرا و ڕۆژانى داهاتووش نۆبڵى فیزیا و ئەدەب دابەشدەکرێت.
ئەو سێ زانایەى خەڵاتى نۆبڵى پزیشکیان وەرگرتووە لە ئەمریکا و ئەڵمانیا کار دەکەن.
ئامرازێکیان دروستکردووە لەڕێگەی ڕووناکییەوە، چۆنییەتی کارکردنی مێشک ئاشکرا دەکات.

کارل دایسیرۆت، تەمەن 54 ساڵ، پیتەر هێگێمان، تەمەن 71 ساڵ و جۆرج ناگڵ، تەمەن 73 ساڵ، لە زانکۆکانی ستانفۆرد لە ئەمریکا و هومبۆڵدت و ڤۆرتسبورگ لە ئەڵمانیا کار دەکەن و خەڵاتەکەیان وەرگرتووە.

داهێنانى سێ زاناکە:

داهێنانەکە پێیدەگوترێت "ئۆپتۆجینەتیک".
ڕێگەی داوە زاناکان بە یارمەتی ڕووناکی، خانە دەمارییەکانی مێشک هەڵبکەن و بکوژێننەوە.
یارمەتییان دەدات باشتر بزانن مێشک چۆن هەڵسوکەوت دەکات یان تووشی نەخۆشی دەبێت.
سەرەتا هێگێمان لێکۆڵینەوەی لە قەوزە سەوزە تاک-خانەکان دەکرد کە دەیانتوانی بەرەو ڕووناکی بجووڵێن.
ئەو و ناگڵ پڕۆتینێکیان دۆزییەوە کە بە ڕووناکیی شین چالاک دەبێت و کارەبا دروست دەکات.
بۆیان دەرکەوت گواستەوەی ئەو پرۆتینە بۆ ناو خانەکانی دیکە، هەمان توانایان پێدەبەخشێت.
پاشان دایسیرۆت ئەم تەکنەلۆجیایەی لەناو مێشکی مشکدا تاقیکردەوە تاوەکو بتوانێت لەڕێگەی ڕووناکییەوە، خانە دەمارییەکان کۆنتڕۆڵ بکات.

دەستپێکى دابەشکردنى خەڵاتەکانى نۆبڵ:

خەڵاتەکە لە پەیمانگای کارۆلینسکا لە ستۆکهۆڵم ڕاگەیێنرا، بەمەش هەفتەی خەڵاتی نۆبڵ دەستپێکرد، پارەی خەڵاتەکە لەمساڵدا نزیکەی 1.2 ملیۆن دۆلارە.
لیژنەی نۆبڵ پێشوازییەکی گەورەی لە داهێنانەکەیان کرد و ڕایگەیاند، ئەم ڕێگایە ئێستا لە تاقیگەکاندا بەکاردێت بۆ تێگەیشتن لە نهێنییەکانی مێشک.
دوای خەڵاتی پزیشکی، براوەکانی خەڵاتی فیزیا لە ڕۆژی سێشەممە، کیمیا لە ڕۆژی چوارشەممە و ئەدەب لە ڕۆژی پێنجشەممە و نۆبڵی ئاشتی لە ڕۆژی هەینی ڕادەگەیێنرێن.