دڵسۆزیى مامۆستایەک لە ڕووسیا دەنگیداوەتەوە.
بە هێماى وەفا و خەمخۆرى بۆ فێربوون دادەنرێت.
لە یەکێک لە گوندە دوورەدەست و شاخاوییەکانی هەرێمی داغستانی ڕووسیا، ژنە مامۆستایەکی تەمەن 45 ساڵ بە ناوی "خەدیجە ماگۆمیدۆڤا"، بووەتە هێمای وەفا و قوربانیدان.
ماوەی نۆ ساڵە، هەفتانە شەش ڕۆژ، ڕێگەیەکی سەخت و پڕ لە هەوراز و نشێوی نێوان چیاکان بەپێ دەبڕێت.
ڕۆژانە 14 کیلۆمەتر ڕێ دەبڕێت کە نزیکەی چوار کاتژمێری پێدەچێت، تەنیا بۆ ئەوەی بگاتە قوتابخانەکەی.
سەرنجڕاکێشترین بەشی چیرۆکەکە ئەوەیە کە لەم قوتابخانە بچووکەدا، خەدیجە هەم بەڕێوەبەرە و هەم تەنیا مامۆستای قوتابخانەکەیە.
تێیدا وانە بە تەنیا سێ قوتابی دەڵێتەوە کە لە دوو قۆناغی جیاوازی خوێندندان.
دوای بڵاوبوونەوەی چیرۆکە کاریگەرەکەی لە تۆڕە کۆمەڵایەتییەکاندا، هەزاران کەس داوایان لە لایەنە پەیوەندیدارەکان کردووە مووچەکەی بۆ زیاد بکرێت و هۆکارێکی گواستنەوەی بۆ دابین بکرێت، بەڵام خەدیجە بەوپەڕی دڵسۆزییەوە دەڵێت: "لەژێر هەر بارودۆخێکدا بێت، هەرگیز قوتابییەکانم بەتەنیا جێناهێڵم."
