سووتانی پێست بەهۆی هەتاوەوە وەک سووتانی پلە یەک هەژماردەکرێت، چونکە تەنها چینی هەرە دەرەوەی پێست دەسووتێت. سەرەڕای ئەوەی کە سووتان بە تیشکی خۆر کێشەیەکی گەورە نییە و خۆی چارەسەردەبێت، بەڵام دەتوانرێت هەندێک ڕێگە بگیرێتە بەر بۆ ئەوەی پڕۆسەی چاکبوونەوە خێراتر و باشتر بێت.

• سووتان، بەهەر هۆکارێک بێت، بڕێکی زۆری ئاوی جەستە لەگەڵ خۆیدا دەبات. بۆیە پێویستە گرنگی بە خواردنەوەی ئاو و شلەمەنی بدرێت.!
• بەکارهێنانی ئەڵۆڤێرا یان کرێمێکی شێدارکەرەوە بۆ شێدارکردنەوەی شوێنی سووتانەکە
• بەکارهێنانی ئاوی سارد بۆ خۆشتن.
• پێویستە پەڕۆیەکی خاوێن بە ئاوی سارد تەڕبکرێت و بخرێتە سەر شوێنی سووتانەکە
• هەرچەندە ئەم جۆرە سووتانە قوڵ نییە، بەڵام دەکرێت زۆر بەئازاربێت. ئەگەر ئازاری زۆر بوو، ئاساییە پاراستۆڵ یان ئیبۆپرۆفین بەکاربهێنرێت.
• ئەگەر جێ سووتانەکە بڵقی کرد، نابێت بتەقێنرێت.
• خۆبەدوورگرتن لە تیشکی خۆر.
• لە کاتی بەکارهێنانی سەهۆڵدا، باشترە راستەوخۆ نەخرێتە سەر شوێنی سووتانەکە، بەڵکوو پارچە قوماشێک بخرێتە نێوان سەهۆڵ و شوێن برینەکە.
  

چ ماددەیەکی سروشتی بەکاربهێنرێت بۆ چارەسەری سووتانەکە؟

• شۆفان: کەمێک شۆفان بخرێتە ناو کیسە یان گۆرەوییەکی پاک، دواتر بخرێتە ناو ئاو و کەسەکە خۆی پێبشوات
• سۆدە یان نیشاستە: دەکرێت یەکێک لەم دوو ماددەیە تێکەڵ بکرێت لەگەڵ ئەو ئاوەی کەسەکە خۆی پێدەشوات بۆ کەمکردنەوەی هەوکردن و خوران.

ئەگەر شوێنی سووتانەکە بڵقی کرد یان پێستی هەڵدا، چی بکرێت؟

نابێت بڵقەکان بتەقێندرێت! ئەگەر خۆیان تەقین، باشترە شوێنی بڵقەکە بە ئاو و سابوون بشۆرێت و بە باندجێک دابپۆشرێت. پێستهەڵدان هەوڵی جەستەمانە بۆئەوەی خۆی ڕزگار بکات لە خانە زیانپێگەیشتووەکانی پێستمان و کاردانەوەیەکی ئاساییە.