ھونەرمەندی دیاری کورد شەماڵ سائیب لە سەدەی ڕابردوودا وەک: موزیکژەن، گۆرانیبێژ، مامۆستا و ئەکادیمی، بێژەر و نووسەر لە ساتەوەختێکی زۆر دژواردا دەرکەوتووە؛ کە ئەوکات کۆمەڵگەی کوردی و ھونەر بە گشتی و موزیکی کوردی بە تایبەتی، بە ھۆکاری باری کۆمەڵایەتی و ڕامیاری و ژێردەستەیدا لە ئاستێکی نەخوازراودا بووە.

ژیانی تایبەتی

• ساڵی 1930 لە خانەوادەیەکی ڕۆشنبیری شاری سلێمانی لەدایکبووە

• لە تەمەنی 15 ساڵیدا بە بەشداریکردنی لە خولێکی ھاوینە، تێکەڵی دنیای هونەر بووە

• لە پەیمانگای ھونەرەجوانەکانی بەغداد، تاوەکو قۆناغی چوارەمی خوێندووە؛ دواتر بووە بە خوێندکاری بەشی مێژوو، بەکالۆریوس لە مێژوو لە زانکۆی بەغداد بەدەستهێناوە

• سەرەتای ساڵی 1960 ڕووی کردووەتە ولایەتە یەکگرتووەکانی ئەمریکا و بڕوانامەی ماستەری لە مێژووی موزیک لە زانکۆی ئیندیانا بەدەستدەھێناوە

• ساڵی 1968 دەستی داوەتە خوێندنی دکتۆرا، لە ھەمان ساڵدا بە ھۆی دامەزراندنی زانکۆی سلێمانیەوە، داوای گەڕانەوەی لێکراوە و دەستبەرداری خوێندنەکەی بووە، لە زانکۆی سلێمانی بووە بە مامۆستا

وێستگە هونەرییەکانی شەماڵ سائیب

شەماڵ سائیب گەشتە هونەرییەکەی لەگەڵ ئەم هونەرمەندانە دەستپێکردووە:

• قادر دیلان

• ڕەفیق چالاک

• حەمەساڵح دیلان

• بەھجەت سەعاتچی

کۆتایی چلەکانی سەدەی ڕابردوو، وەکو یەکێک لە عودژەن و گۆرانیبێژە بە تواناکانی ڕادیۆی کوردیی بەغداد دەرکەوتووە، چەندین ئاواز و گۆرانی بۆ خۆی و کۆمەڵێک لاوی ھاوتەمەنی خۆی داناوە:

• وەکو کۆرسی گۆرانی ڕۆڵیگێڕاوە

• بە وتەی زۆریک لە ھاوڕێیان و ھاوسەردەمانی، نەک تەنیا لە کوردستان بەڵکو لە تەواوی عیراقدا خاوەنی گوێگرێکی زۆر بووە

• کاریگەر بووە بە موزیکی عەرەبی

• سەرسام بووە بە (فەرید ئەترەش) کە بە ئاشکرا لاسایی کردووەتەوە

• خاوەنی زنجیرەیەک وتاری گرنگە لەبارەی موزیک کە لە ڕۆژنامەی ژین و گەلاوێژ بڵاوکراونەتەوە

• وەک بێژەر خاوەنی بەرنامە بووە بەناوی (باخچەی مۆسیقا) لە ڕادیۆی کوردی

• وەکو یەکەمین ھونەرمەندی کورد توانیویەتی کلیپ بۆ گۆرانیەکانی بکات

• خانمان بەدەنگ و ڕەنگ ڕۆڵیان گێڕاوە لە کارەکانیدا، کە ئەمە بۆ ئەو ڕۆژگاری کۆمەڵگای کوردی و موزیکی کوردی شتێکی نوێ و ھەم نەخوازراو بووە

ناسراوترین گۆرانیەکانی:

• ئەرە لەیلێ

• ھەی بەردە بەردە

• پێم بڵێ پێت دەڵێم

• ھاوار سەد ھاوار

• وەرە وەرە توخوا وەرە

شەماڵ سائیب وەکو ھونەرمەندانی ھاوسەردەمی خۆی بە کولەمەرگی ژیاوە و دواجار بە بەنەخۆشی، ڕێکەوتی حەوتی تشرینی دووەمی 1986 کۆچی دوایی کردووە و لە گردی سەیوان بەخاک سپێدراوە.