کیم جۆنگ ئون، سەرۆکی کۆریای باکوور، فەرمانی دا ساڵی داهاتوو بەرهەمهێنانی مووشەک لە وڵاتەکەى "فراوان و نوێ بکرێتەوە" و کارگەی زیاتر دروست بکرێن.

پێداویستییە لۆجستییەکان

ئاژانسی هەواڵی ناوەندی کۆریاى باکوور، بڵاویکردەوە، کیم، لەسەردانێکدا کە بەرپرسانی باڵا یاوەرییان کردووە، داوای لە کارگەکانی چەک و تەقەمەنی کردووە ئامادەکاری بکەن بۆ دابینکردنی پێداویستییەکانی "هێزى مووشەکى و تۆپهاوێژى".

بەرزکردنەوەى ئاست و تواناى بەرهەمهێنان

کیم، گوتی "ئەو کارگانە پێویستیان بە بەهێزکردنى توانای بەرهەمهێنان هەیە بۆ ئەوەی بتوانن داواکارییەکانی هێزە چەکدارەکان لە پیۆنگیانگ جێبەجێ بکەن و سەرپەرشتی دروستکردنی کارگەی چەک و تەقەمەنی بکەن".

گرنگى مووشەک و تۆپهاوێژ لاى سەرۆک

سەرۆکی کۆریای باکوور بۆچوونى وابووە "کەرتی بەرهەمهێنانی مووشەک و تۆپهاوێژ زۆر گرنگە بۆ بەهێزکردنی هێزی وەڵامدانەوە".

زیادبوونى تاقیکردنەوەکان

ئەوەش لە کاتێکدایە پیۆنگیانگ لەم ساڵانەی دواییدا تاقیکردنەوەی مووشەکی بەشێوەیەکی بەرچاو زیادکردووە.

بەرەنگارى بلۆکى خۆرئاوا

شیکەرەوەکان بۆچوونیانوایە ئامانجی پەرەپێدانی توانا مووشەکییەکان بەرەنگاربوونەوەی ئەمریکا و کۆریای باشوورە و هەروەها تاقیکردنەوەی چەکەکانیشە پێش هەناردەکردنیان بۆ ڕووسیا.

برەودان بە بوارى ژێردەریایی ئەتۆمى

ڕۆژێک لەمەوبەر، میدیا فەرمییەکان بڵاویان کردەوە کە کیم جۆن ئوون، سەردانی کارگەیەکی ژێردەریایی ئەتۆمی کردووە و بەڵێنی داوە ڕووبەڕووی هەڕەشەی بەرهەمهێنانی ژێردەریایی هاوشێوە ببێتەوە.

بەستنى کۆنگرە

چاوەڕوان دەکرێت پارتی کرێکارانی کۆریا لە سەرەتای ساڵی 2026 یەکەم کۆنگرەی خۆی لە ماوەی پێنج ساڵدا بکات و تیایدا سیاسەتمەدارەکان تاوتوێی پلانەکانی گەشەپێدانی ئابووری و سەربازی بۆ پێنج ساڵی داهاتوو بکەن.