نەشئەت شاهوێز، سەرۆکی لیژنەی ئاسایش و بەرگری لە ئەنجوومەنی پارێزگای کەرکووک، ئاشکرای کرد، ئێستا کار بۆ کاراکردنی زیاتری لیوا هاوبەشەکان دەکەن و بەهۆی فراوانیی ناوچەکانەوە هەوڵەکان بە ئاڕاستەی زیادکردنی ژمارەی ئەو هێزانەن.

کاراکردنی لیواکان بۆ پڕکردنەوەی بۆشاییەکان

سەرۆکی لیژنەی ئاسایش و بەرگری، ڕایگەیاند، ئەگەرچی لیوای هاوبەش بەمەبەستی پڕکردنەوەی بۆشایی ئەمنی پێکهێنراوە، بەڵام هەوڵەکان چڕکراونەتەوە بۆ ئەوەی ئەو لیوایانە زیاتر کارا بکرێن، بە شێوەیەک بتوانن کۆنتڕۆڵی ئەو بۆشاییە ئەمنییانە بکەن کە لە سنووری کەرکووک و دەوروبەری هەن و مەترسییان دروست کردووە.

پێویستی بە زیادکردنی هێزەکان

نەشئەت شاهوێز، بۆ کەناڵ8 باسی لەوەشکرد، پانتایی بۆشایی ئەمنی لە کەرکووک و ناوچەکانی دەرەوەی ئیدارەی هەرێم ئێجگار زۆرە و وەک پێویست خەم لەو ناوچانە نەخوراوە، هەر بۆیە لە هەوڵدان بۆ زیادکردنی ژمارەی لیوا هاوبەشەکان تاوەکو بتوانن بەسەر ئەو ڕووبەرە فراوانەدا زاڵ بن.

گەیاندنی نیگەرانییەکان و پاراستنی ناوچەکە

ناوبراو ئاماژەی بەوەشکرد، بەردەوام لەگەڵ فەرماندەیی ئۆپەراسیۆنەکانی کەرکووک لە پەیوەندیدان و نیگەرانیی خەڵکیان گەیاندووەتە لایەنە پەیوەندیدارەکان. جەختیشی کردەوە، زۆر پێویستە لیوای هاوبەشی دیکە دروست بکرێت و پێشمەرگە و سوپا پێکەوە بتوانن پارێزگاری لەو ناوچانە بکەن و ئاسایش بۆ دانیشتووانەکەی بگێڕنەوە.