جەمسەری باکوور و باشوور وەک بەفرگری سروشتیی زەوی کار دەکەن. بەهۆی ڕەنگی سپیی بەفر و سەهۆڵەکەوە، تیشکی بەتینی خۆر دەگەڕێننەوە بۆ ناو بۆشایی ئاسمان و ڕێگری دەکەن لەوەی زەوی گەرمایەکی زۆر هەڵبمژێت. توانەوەی ئەم سەهۆڵانە بەواتای کەمبوونەوەی ئەو توانایە دێت، کە ئەوەش دەبێتە هۆی دروستبوونی شەپۆلی گەرمای توندتر لە سەرانسەری جیهاندا.

شەپۆلی گەرمای توند و زستانی سەخت

کەمبوونەوەی سەهۆڵەکان تەنیا نابێتە هۆی گەرمبوونی زەوی، بەڵکو دەبێتە هۆی دروستبوونی زستانی سەختتر و توندتر. بەهۆی گەرمبوونی هەوای جەمسەرەکان، ڕەوتی هەوای جەمسەری باکوور ناجێگیر دەبێت و سەرماوسۆڵەیەکی توند بەرەو ناوچەکانی دیکە دەهێنێت. ئەم گۆڕانکارییانە وادەکەن کەشوهەوا بە شێوەیەکی چاوەڕواننەکراو بگۆڕێت و پێشبینیکردنی کارێکی ئەستەم بێت.

مەترسیی بەرزبوونەوەی ئاستی دەریاکان و نغرۆبوونی شارەکان

لە ساڵی 1900ـەوە، ئاستی دەریای جیهان بە ڕێژەی 17 بۆ 20 سانتیمەتر بەرزبووەتەوە. بەردەوامیی ئەم دۆخە مەترسیی گەورە بۆ سەر شارە کەناراوەکان و وڵاتە دوورگەییەکان دروست دەکات، بە شێوەیەک لافاو و زریانەکان توندتر دەبن. بۆ نموونە، ئەگەر چینی سەهۆڵی دوورگەی گرینلاند بە تەواوی بتوێتەوە، ئاستی ئاوی دەریاکانی جیهان نزیکەی 6 مەتر بەرز دەبنەوە.

تێکچوونی کەرتی کشتوکاڵ و بەرزبوونەوەی نرخی خۆراک

گۆڕانکارییە توندەکانی کەشوهەوا زیانی ڕاستەوخۆ بە بەروبوومە کشتوکاڵییەکان دەگەیەنن. ئەمەش دەبێتە هۆی کەمبوونەوەی بەرهەم و بەرزبوونەوەی نرخی خۆراک لە بازاڕەکانی جیهاندا. ئەم بارودۆخە زیاتر کاریگەریی نەرێنی لەسەر ئەو کەسانە دەبێت کە توانای داراییان سنووردارە و بە زەحمەت ژەمە خۆراکەکانیان دابین دەکەن.

ڕێڕەوە نوێیەکانی گواستنەوە و مەترسییە ژینگەییەکان

توانەوەی سەهۆڵەکان ڕێڕەوی نوێی گواستنەوەی دەریایی لە جەمسەری باکووردا دەکاتەوە کە ماوەی کاتی گواستنەوەی کاڵاکان کەم دەکاتەوە. هەرچەندە ئەمە بۆ کۆمپانیاکان سوودی ئابووریی هەیە، بەڵام مەترسیی ژینگەیی گەورەی وەک تێکشانی کەشتی و ڕژانی نەوتی لێدەکەوێتەوە. لە ئەگەری هەر ڕووداوێکیشدا، گەیشتنی تیمەکانی فریاکەوتن بۆ ئەو ناوچە دوورانە کارێکی مەحاڵ دەبێت.

لەناوچوونی ژیانی کێوی و ململانێ لەگەڵ مرۆڤ

نەمانی سەهۆڵ و توانەوەی بەستەڵەکی هەمیشەیی، ژیانی ئاژەڵە جەمسەرییەکانی وەک ورچ، ڕێوی و ئاسک دەخاتە مەترسییەوە. کاتێک ژینگەی سروشتیی ئەم ئاژەڵانە لەناو دەچێت، ناچار دەبن پەنا ببەنە بەر ناوچەکانی نیشتەجێبوونی مرۆڤ، ئەمەش دەبێتە هۆی دروستبوونی ململانێ لەنێوان مرۆڤ و ژیانی کێوی و تێکچوونی هاوسەنگیی ژینگەیی.

دەردانی گازی میسان و بڵاوبوونەوەی ڤایرۆسە کۆنەکان

سەهۆڵ و بەستەڵەکی جەمسەرەکان بڕێکی زۆر گازی میسانیان تێدا قەتیس بووە، کە گازێکی گەرمکەرەوەی بەهێزە. لەگەڵ توانەوەی سەهۆڵەکان، ئەم گازە دەردەچێت و گەرمبوونی زەوی خێراتر دەکات. لە لایەکی دیکەشەوە، ئەم تاشە سەهۆڵانە چەندین جۆری ڤایرۆس و میکرۆبی دێرینیان تێدا پارێزراوە، کە بە توانەوەیان ئەگەری بڵاوبوونەوەی نەخۆشیی نوێ و مەترسیدار لە جیهاندا زیاد دەکات.