پووختەى هەواڵەکە:

• لە شەڕی ئێران و عێراق دڕکەپەتکی پچڕا بوو.

• بەو دۆخە تەندروستییەوە کۆڵى نەداو هەمیشە سەرقاڵى خوێندنەوە و فێربوون بوو.

• بەشدارانى تۆڕە کۆمەڵاتییەکان بە "ئەیوبی کورد" ناویانبردووە.

• ئامۆژگارى خەڵکى کردووە لە نەخۆشى و ناڕەحەتیدا ئارام بگرن.

هاشم کەلاری دانیشتووى گەرمیان کە بە نەخۆشە ئارامگرەکە ناسراو بوو، پاش 45 ساڵ نەخۆشی و مانەوە لە جێگەدا، کۆچی دوایی کرد.

زانیارییەکان لەبارەى هاشم کەلاری لە زارى کەسە نزیکەکانییەوە:

• لە ساڵی 1960 لە گردەگۆزینەى کەلار لەدایکبووە.

• لە ساڵى 1980 و لە تەمەنی 20 ساڵیدا، لە جەنگی ئێران و عێراق، بریندار بووە و بەهۆیەوە، دڕکەپەتکی پچڕاوە.

• 45 ساڵی ژیانی لەسەر جێگە بەسەربرد و ڕۆژی دووشەممە، کۆچی دوایی کرد.

• لەسەر جێگەکەى تەنیا توانیویەتى سەرى بجوڵێنێت.

• نیوەی قورئانی پیرۆز و ژمارەیەکى زۆرى فەرموودەکانى پێغەمبەرى ئیسلامى لەبەر کردووە.

لەگەڵ ئەوەی بەهۆی پچڕانی دڕکەپەتکییەوە تەنیا دەیتوانی سەری بجوڵێنێت، بەڵام کۆڵی نەدەدا و سەرەڕای ئازار و نەخۆشییەکەی، بەردەوام ئامۆژگاری خەڵکی دەکرد لەسەر ناخۆشییەکان ئارام بگرن.

کۆچى دوایی هاشم کەلارى، کاردانەوەى لە تۆڕە کۆمەڵایەتییەکان لێکەوتەوە و ئەو کەسانەى لە نزیکەوە دەیناسن، بە ئەیوبی کوردى، وەکو ئاماژەیەک بۆ ئارامگریی پێغەمبەر ئەیوب ناوی دەبەن.