سەرۆککۆماری ئێران لە پەیوەندییەکی تەلەفۆنیدا لەگەڵ سەرۆکوەزیرانی پاکستان، مەرجەکانی وڵاتەکەی بۆ سەرکەوتنی دیالۆگ ئاشکرا دەکات و هۆشداری لە توندکردنەوەی فشارە سەربازییەکان دەدات.

پەیوەندیی تەلەفۆنیی نێوان پزیشکیان و شەهباز شەریف

مەسعود پزیشکیان، سەرۆککۆماری ئێران لە پەیوەندییەکی تەلەفۆنیدا لەگەڵ شەهباز شەریف، سەرۆکوەزیرانی پاکستان، هەوڵە دیپلۆماسییەکان و پرسی ئاگربەستیان تاوتوێ کرد. پزیشکیان ڕایگەیاند کە گەمارۆکان و ناردنی هێزی سەربازیی زیاتر، ئاستەنگی گەورەن لەبەردەم بونیادنانی متمانە و بەرەوپێشچوونی هەوڵە دیپلۆماسییەکان.

کاریگەریی گەمارۆکان لەسەر متمانەی دوولایەنە

سەرۆکایەتیی ئێران بڵاویکردەوە، پزیشکیان دووپاتی کردووەتەوە کە مەرجی بنەڕەتی بۆ بەرەوپێشچوون، گەیشتنە بە دیدگایەکی هاوبەش و ڕەخساندنی ژینگەیەکی گونجاو بۆ دیالۆگ. ناوبراو ئاماژەی بەوە کردووە کە باسکردنی دیالۆگ هاوشان لەگەڵ بەردەوامیی گەمارۆ و فشارەکان، متمانەی نێوان لایەنەکان ناهێڵێت و ناردنی هێزی سەربازییش تەنیا دۆخەکە ئاڵۆزتر دەکات.

مەرجەکانی تاران بۆ چارەسەری ناکۆکییەکان

سەرۆککۆماری ئێران جەختی لەسەر پێویستیی ڕاگرتنی دوژمنکارییەکان کردووەتەوە. پزیشکیان ڕایگەیاندووە کە پێشکەشکردنی گەرەنتی بۆ دووبارەنەبوونەوەی ئەو دوژمنکارییانە، مەرجێکی سەرەکییە بۆ زەمینەسازیی چارەسەرکردنی ناکۆکییەکان.

هەڵوێستی ئیسلام ئاباد وەک نێوەندگیر

لە بەرامبەردا، شەهباز شەریف، سەرۆکوەزیرانی پاکستان دووپاتی کردووەتەوە کە وڵاتەکەی وەک نێوەندگیر هەموو هەوڵێکی خۆی دەخاتە گەڕ بۆ ئەوەی گفتوگۆکان بە ئەنجامێکی "شکۆمەندانە" بگەن.