چوار وڵاتی گەورەی ئیسلامی خەریکی دروستکردنی هاوپەیمانییەکی سەربازین هاوشێوەی ناتۆ، کە تێیدا هێزی ئەتۆمی، تەکنەلۆژیای درۆن و داهاتی نەوت و غاز یەکدەخرێن.

هەوڵە بێدەنگەکان بۆ دروستکردنی "ناتۆی ئیسلامی"

هەر چوار وڵاتی پاکستان، تورکیا، سعودیە و قەتەڕ بە نیازن هاوپەیمانییەکی سەربازی هاوشێوەی ناتۆ دروست بکەن کە لە میدیاکاندا بە "ناتۆی ئیسلامی" دەناسرێت. بۆ ئەو مەبەستەش، بەبێدەنگی و دوور لە چاوی میدیاکان، خەریکی بەهێزکردنی هەماهەنگییە بەرگرییەکانی نێوانیانن. ئەم هاوپەیمانییە وەک سیستمێکی ئاسایشی بەکۆمەڵ داڕێژراوە، بە جۆرێک کە هێرشکردنە سەر هەر ئەندامێکیان بە هێرشکردنە سەر هەموو ئەندامەکانی دیکە هەژمار دەکرێت.

تێکەڵکردنی چەکی ئەتۆمی و داهاتی وزە

لە ڕووی هێزی سەربازییەوە، پاکستان خاوەنی چەکی ئەتۆمی و سوپایەکی گەورەی 650,000 سەربازییە. تورکیاش بە مووشەکی پێشکەوتوو، درۆنی بايراکتار و 400,000 سەربازی چالاک بەشدار دەبێت. هەرچی سعودیە و قەتەڕن، هەرچەندە لە ڕووی ژمارەی سەربازەوە وەک دوو وڵاتەکەی دیکە نین، بەڵام لە ڕێگەی داهاتی نەوت و غازەوە دەتوانن بودجەیەکی گەورە بۆ هاوپەیمانییەکە دابین بکەن.

خواجە محەممەد عاسیف و هاوپەیمانی چوارقۆڵی

خواجە محەممەد عاسیف، وەزیری بەرگریی پاکستان ڕایگەیاندووە، تورکیا و قەتەڕ دەتوانن بەشداری لەو پەیمانە بەرگرییە بکەن کە ساڵی ڕابردوو لە نێوان پاکستان و سعودیە واژۆ کراوە. ئیسلامئاباد ئەم هەماهەنگییەی بە "چوارقۆڵی سەربازی" ناوبردووە. ئەم بابەتە لە کۆتایی 2025 و ئەمساڵدا زیاتر باسکراوە، بەتایبەت دوای هێرشەکانی ئیسرائیل و گرژییەکانی ئەمریکا و ئێران لە ناوچەکەدا.

هەڵوێستی وڵاتان و بەربەستەکانی بەردەم تورکیا

سعودیە و قەتەڕ تاوەکو ئێستا بە فەرمی پێکهێنانی هاوپەیمانییەکی هاوشێوەی ناتۆیان پشتڕاست نەکردووەتەوە و تەنیا بە "هاوکاری ستراتیژی" وەسفی دەکەن. بۆ تورکیا بڕیارەکە قورسترە، چونکە ئەندامی ناتۆیە و ناتوانێت بچێتە هاوپەیمانییەک کە دژی بەرژەوەندییەکانی ناتۆ بێت. بەڵام لاوازبوونی ناتۆ و هەڕەشەکانی دۆناڵد ترەمپ بۆ کشانەوە لە ڕێکخراوەکە، وای کردووە ئەنقەرە بیر لە هاوپەیمانی جێگرەوە بکاتەوە. بڕیاری کۆتایی تورکیا لە دوای لوتکەی ناتۆ لە 7 و 8ـی تەمموز لە ئەنقەرە ڕوون دەبێتەوە.