دوای دەستپێکردنی پرۆسەکە لەلایەن سەرایا سەلامەوە، بڕیارە چەکدارانی عەسائیبی ئەهلی حەق و کەتیبەکانی ئیمام عەلییش تێکەڵی ناو سوپای فەرمیی دەوڵەتی عێراق بکرێن. ئەم هەنگاوەش لە چوارچێوەی پلانی ستراتیژیی حکومەتدایە بۆ کۆکردنەوەی سەرجەم چەکەکان لە ژێر کۆنترۆڵی دەزگا ئەمنییەکاندا.

دەستپێکردنی پرۆسەکە لە سامەڕاوە

دوای سەرایا سەلام، پرۆسەی تێکەڵکردنی چەکدارانی عەسائیبی ئەهلی حەق و کەتیبەکانی ئیمام عەلی بە سوپای دەوڵەت دەستپێدەکات و سەعد مەعن، سەرۆکی شانەی ڕاگەیاندنی ئەمنیی عێراق ڕایگەیاند، یەکەم هەنگاوی کرداری بۆ کۆکردنەوەی چەک لە دەستی دەوڵەتدا، بە فەرمی لە سامەڕا لەگەڵ سەرایا سەلام دەستیپێکرد؛ گرووپەکانی دیکەی وەک عەسائیبی ئەهلی حەق و کەتیبەکانی ئیمام عەلی بەدەم بانگەوازەکەوە هاتوون و دەستیانکردووە بە ڕێکارە یاساییەکان بۆ تەواوکردنی پرۆسەکە، هاوشێوەی سەرایا سەلام.

داڕشتنەوەی پەیکەربەندیی حەشدی شەعبی

سەبارەت بە پەیکەربەندی و فەرماندەیی لیواکانی حەشدی شەعبی، سەعد مەعن ئاماژەی بەوە کرد، ئەو دۆسیەیە لەنێو چوارچێوە و ڕێکخستنەکاندایە و بە ڕادەستکردنی چەکە قورس و مامناوەندەکان و داڕشتنەوەی پەیکەربەندی و تێکەڵکردنی تەواوەتی دەستپێدەکات.

دیدگای ستراتیژی بۆ دابەشکردنی ئەرک و چالاکییەکان

جەختیشی کردەوە، فەرماندەیی ئۆپراسیۆنە هاوبەشەکان دیدگایەکی ستراتیژیی هەیە بۆ دابەشکردنی ئەرک و چالاکییەکان لە شوێنی گرووپەکان و پاسەوانی سنوور، بە جۆرێک لەگەڵ بەرژەوەندیی باڵای نیشتمانی و گرەنتیی مافی سەرجەم چەکداران بگونجێت.

پچڕانی پەیوەندییە سیاسییەکان

بە گوتەی سەعد مەعن، ئەو گرووپانەی دەچنە ژێر چەتری دامەزراوە ئەمنییەکان، هیچ پەیوەندییەکی سیاسییان نامێنێت و لە ڕێگەی دامەزراوە ئەمنییەکانەوە فەرمانی جووڵە وەردەگرن و ڕێنمایی دەکرێن.