ئەندامێکی مەکتەبی سیاسی کۆمەڵی دادگەریی ڕایدەگەیەنێت، دەسەڵاتە شەرعییەکان لە هەرێمی کوردستان پەکخراون و جەخت لە پێویستی یەکگرتنەوەی هێزەکانی پێشمەرگە و دروستکردنی هێزێکی نیشتمانی دەکاتەوە.

کاراکردنەوەی دەسەڵاتە شەرعییەکان

فەخرەدین قادر، ئەندامی مەکتەبی سیاسی و لێپرسراوی پەیوەندییەکانی کۆمەڵی دادگەریی کوردستان ڕایگەیاند، هەرچەندە ئەوان بایکۆتی ئەم خولەی پەرلەمانیان کردووە، بەڵام پێیان وایە دەبێت هەرێمی کوردستان خاوەن حکومەت و پەرلەمان بێت. ئاماژەی بەوەشکرد، ئێستا دەسەڵاتە شەرعییەکان لە هەرێمی کوردستان پەکخراون و دەسەڵاتی دادوەری لەژێر پرسیاردایە، بۆیە پێویستە بەگوێرەی هەلومەرجی ئێستا دەسەڵاتە شەرعییەکان بەگەڕبخرێنەوە.

پەیامی ئەمریکا و یەکگرتنەوەی هێزەکان

سەبارەت بە سەردانی شاندە بیانییەکان، فەخرەدین قادر بۆ کەناڵ8ـی ڕاگەیاند، هاتنی تۆم باراک گەیاندنی پەیامی ئەمریکایە بەوەی سیاسەتی ئەوان گرنگیدانە بە ناوەند و یەکگرتنەوەی هێزەکانی پێشمەرگە. باسی لەوەشکرد کە کۆمەڵگەی نێودەوڵەتی چاودێری وردی پرۆسەی یەکخستنی هێزەکان دەکات.

دروستکردنی هێزی نیشتمانی و کۆنترۆڵکردنی چەک

لێپرسراوی پەیوەندییەکانی کۆمەڵی دادگەری جەختی لەوە کردەوە، دەبێت هەرێمی کوردستان خاوەن هێزی نیشتمانی بێت و هەمووان لە چوارچێوەی دەسەڵاتی دامەزراوە شەرعییەکاندا بن. هەروەها سەبارەت بە پرسی ڕادەستکردنی چەک بە دەوڵەت، ئاماژەی بەوە کرد کە پشتگیری لەو هەوڵە دەکەن و ئەوە بە هەنگاوێکی باش بۆ هەرێمی کوردستان و عێراق دادەنێن.