لەگەڵ هاتنی کۆتاییەکانی وەرزی کۆکردنەوەی چەوەندەری پاییزە لە سەرپێڵی زەهاوی سەر بە پارێزگای کرماشان، جووتیاران بەرهەمەکانیان ڕەوانەی حەوت کارگەی شەکر دەکەن؛ لەکاتێکدا کرماشان ساڵانە نزیکەی 1 ملیۆن تۆن چەوەندەر بەرهەم دەهێنێت و بە یەکێک لە پارێزگا پێشەنگەکان دادەنرێت، بەشێک لە شۆفێرانی گواستنەوەی بەرهەمەکە بەهۆی دواکەوتنی کرێکانیان لەلایەن حکومەتەوە گلەیی دەکەن.

کۆکردنەوەی بەرهەمی چەوەندەر لە سەرپێڵی زەهاو

کۆتاییەکانی وەرزی کۆکردنەوەی چەوەندەری پاییزەیە لە سەرپێڵی زەهاوی کرماشان و جووتیاران بەرهەمی ماندبوونیان کۆدەکەنەوە و ڕەوانەی بازاڕ و کارگە و یەکە پیشەسازییەکانی دەکەن.

دابینکردنی کەرەستەی خاو و هەلی کار

جووتیاران بەرهەمەکانیان بۆ 7 کارگەی شەکر لە ناوەوە و دەرەوەی پارێزگای کرماشان هەناردە دەکەن و دڵخۆشن بەرهەمەکەیان کەرەستەی خاوی پیشەسازیی شەکرە، هەلی کاریشی بۆ هەزاران هاونیشتمانی دابین کردووە.

پێگەی کرماشان لەسەر ئاستی ئێران

پارێزگای کرماشان بە یەکێک لە پارێزگا پێشەنگەکانی لە بەرهەمی چەوەندەر لە ئێران دادەنرێت و ساڵانەش بەرهەمی پارێزگاکە دەگاتە نزیکەی 1 ملیۆن تۆن، زۆرترین ڕووبەری چاندنی چەوەندەری پارێزگاکەش دەکەوێتە شارەکانی کرماشان، ئیسلامئاباد، سەحنە.

گلەیی و کێشەی شۆفێرانی گواستنەوە

بەشێک لە شۆفێران لەبارەی بەرزبوونەوەی هەڵاوسان و گرانبوونی پێداویستییەکان و دواکەوتنی شایستەکانیانەوە گلەییان لە حکومەت هەیە و دەڵێن، حکومەت لە کاتی خۆیدا کرێی بارکردنی بەرهەمەکانیان بۆ کارگەکان پێنادات.

ڕووبەری چاندنی چەوەندەر لە پارێزگاکە

بەگوێرەی دامەزراوەی کشتوکاڵی پارێزگای کرماشان، بۆ ئەمساڵ ڕووبەری چاندنی چەوەندەر لە پارێزگاکە دەگاتە 22 هەزار و 729 هێکتار زەوی، لەو ژمارەیەش 15 هەزار و 947 هێکتاری بۆ چەوەندەری بەهارە و 6 هەزار و 783 هێکتاری بۆ چەوەندەری پایزە تەرخانکراوە.

پێشبینییەکان بۆ بەرهەمی چەوەندەر ئێران

بەگوێرەی ئامارە فەرمییەکانی وڵاتەکە، بۆ ئەمساڵ پێشبینی بەرهەمهێنانی 8.5 ملیۆن تۆن چەوەندەر لە سەرانسەری ئێران دەکرێت.