بڕیارە سبەی دووشەممە، سەرۆکوەزیرانی عێراق بە سەرۆکایەتی شاندێکی باڵا بگاتە واشنتن، گوتەبێژی حکوومەتیش دەڵێت، ئەم سەردانە وەرچەرخانێکی نوێیە لە پەیوەندییەکانی هەردوولا و جەخت لەسەر کەرتی ئابووری و وەبەرهێنان دەکرێتەوە.

وردەکاریی گەشتەکەی سەرۆکوەزیران

ئەمڕۆ یەکشەممە 12ـی تەممووزی 2026، حەیدەر عەبودی گوتەبێژی حکوومەتی عێراق ڕایگەیاند، سبەی دووشەممە 13-7-2026، عەلی زەیدی سەرۆکوەزیرانی عێراق بە سەرۆکایەتی شاندێکی فەرمی بەرەو ئەمریکا بەڕێدەکەوێت. ئەم سەردانە لە کاتێکی هەستیاری ناوچەکەدا ئەنجام دەدرێت و ئامانجی بەرجەستەکردنی پەرەپێدانی پەیوەندییە دەرەکییە هاوسەنگەکانە لەسەر بنەمای بەرژەوەندی هاوبەش و جێبەجێکردنی بەرنامەی وەزاریی حکوومەت.

کارنامەی کۆبوونەوەکان و واژۆکردنی ڕێککەوتنەکان

سەرۆکوەزیران عەلی زەیدی لە واشنتن کۆبوونەوەی گرنگ لەگەڵ دۆناڵد ترەمپ، سەرۆکی ئەمریکا و بەرپرسانی باڵا و دامەزراوە ئابووری و داراییەکان ئەنجام دەدات. لە چوارچێوەی سەردانەکەدا، چەند یاداشتێکی لێکتێگەیشتن لە بواری سندوقی گەشەپێدان و وزەی عێراقی-ئەمریکی واژۆ دەکرێن، کە تیشک دەخەنە سەر هاندانی ژینگەی وەبەرهێنان لە کەرتەکانی وزە، بازرگانی و تەکنەلۆژیا.

وەرچەرخان لە پەیوەندییەکانی بەغدا و واشنتن

گوتەبێژی حکوومەت ئاماژەی بەوە کرد، ئەم سەردانە جیاوازە لەوانی پێشوو و تێیدا سروشتی پەیوەندییەکان لە قۆناغی بەڕێوەبردنی قەیرانەکانەوە دەگۆڕێت بۆ هاوبەشییەکی ئابووری درێژخایەن. عەبودی جەختی کردەوە کە هیچ گۆڕانکارییەک لە ڕێککەوتنی چوارچێوەی ستراتیژیدا نەکراوە و تەواوی لێکتێگەیشتنە نوێیەکان لەسەر بنەمای ئەو ڕێککەوتنە دەبن، عێراقیش دەیەوێت ڕۆڵێکی ئەرێنی لە لێکنزیکبوونەوەی ناوچەییدا بگێڕێت.

دۆسیە ناوخۆییەکان و چەک لە دەستی دەوڵەت

لەسەر ئاستی ناوخۆ، حەیدەر عەبودی ڕایگەیاند، کۆنترۆڵکردنی چەک و قەتیسکردنی لە دەستی دەوڵەتدا بڕیارێکی تەواو عێراقییە بۆ دەستەبەرکردنی کەشێکی لەبار بۆ وەبەرهێنان و سەقامگیری. سەبارەت بە تەواوکردنی کابینەی حکوومەتیش، ڕوونی کردەوە کە ئەم بابەتە پەیوەستە بە کۆدەنگی سیاسی لایەنەکان و حکوومەت لە ڕێگەی شاندەکەیەوە کار بۆ چارەسەرکردنی بۆشاییەکانی کابینەکە دەکات.