عەلی زەیدی، سەرۆکوەزیرانی عێراق لە واشنتن زنجیرەیەک کۆبوونەوەی گرنگی لەگەڵ بەرپرسانی دارایی و دیپلۆماسی ئەمریکا ئەنجامدا و جەختی لە گۆڕینی پەیوەندییەکان لە چوارچێوەی سەربازییەوە بۆ قۆناغێکی نوێی گەشەپێدان و وەبەرهێنان کردەوە.

چاکسازیی بانکی و بەرەنگاربوونەوەی گەندەڵی

سەرۆکوەزیرانی عێراق لەگەڵ سکۆت بێسنت، وەزیری خەزێنەی ئەمریکا کۆبووەوە و ڕایگەیاند، عێراق لەبەردەم قۆناغێکی نوێدایە بۆ دروستکردنی دەوڵەتێکی خاوەن سەروەری و دوور لە گەندەڵی. زەیدی ئاماژەی بەوە کرد کە چاکسازییەکانی کەرتی بانکی، باج و گومرگ بەردەوامن و ساڵی داهاتوو هاووڵاتییان ئەنجامی ئەم ڕێکارانە دەبینن. لە بەرانبەردا وەزیری خەزێنەی ئەمریکا پاڵپشتی واشنتنی بۆ گۆڕینی شێوازی پەیوەندییەکان لە سەربازییەوە بۆ وەبەرهێنان و لادانی بەربەستە ئابوورییەکان دەربڕی.

دیدی باڵیۆزەکان بۆ داهاتووی پەیوەندییەکان

هەر لە چوارچێوەی سەردانەکەیدا، زەیدی لەگەڵ ژمارەیەک لە باڵیۆزە پێشووەکانی ئەمریکا لە عێراق کۆبووەوە. لەم دیدارەدا باس لە شێوازی پەرەپێدانی پەیوەندییەکانی نێوان بەغداد و واشنتن لەسەر بنەمای ڕێزگرتنی دوولایەنە و بەرژەوەندیی هاوبەش کرا. زەیدی گوێبیستی دیدگا و ئەزموونی باڵیۆزەکان بوو لەبارەی چۆنیەتی دروستکردنی پەیوەندییەکی هاوسەنگ و بەردەوام کە خزمەت بە سەقامگیریی وڵاتەکە بکات.

بنیاتنانەوەی ژێرخان و گەشەپێدانی دیجیتاڵی

تەوەرێکی دیکەی کۆبوونەوەکانی سەرۆکوەزیران لەگەڵ بێن بلاک، بەڕێوەبەری جێبەجێکاری دامەزراوەی پارەدارکردنی گەشەپێدانی نێودەوڵەتی ئەمریکی (DFC) بوو. هەردوولا باسیان لە هەلەکانی وەبەرهێنان لە بوارەکانی وزە، گواستنەوە، کشتوکاڵ و ئابووریی ژمارەیی کرد. بەرپرسی دامەزراوە ئەمریکییەکە ئامادەیی نیشان دا بۆ هاوکاری و بەشداریکردن لە (سندووقی گەشەپێدان) و پاڵپشتیکردنی کۆمپانیاکانی ئەمریکا تاوەکو لە پڕۆژە ستراتیژییەکانی عێراقدا کار بکەن.