عەباس عێراقچى، وەزیرى دەرەوەى کۆمارى ئیسلامیى ئێران لە پەیوەندییەکی تەلەفۆنیدا لەگەڵ هاوتا عێراقییەکەی ڕایگەیاند، پەیوەندییەکانی نێوان هەردوو وڵات دێرینە و نابێت لێدوانى کەسیی کاریگەریی لەسەر دروست بکات.

تاوتوێکردنی ئاسایش و سەقامگیری ناوچەکە

عەباس عێراقچى و فوئاد حسێن لە پەیوەندییە تەلەفۆنییەکەدا، دوایین گۆڕانکارییەکان و ئەو ئاڵنگارییە بەردەوامانەى لەسەر ئاسایش و سەقامگیریی ناوچەکە هەن تاوتوێکرد و هەردوولا جەختیان لەسەر هەماهەنگیى تەواو کردەوە بۆ ڕێگری لە پەرەسەندنى زیاتری گرژییەکان و پاراستنى ئاشتی و ئاساییشى هەرێمى.

جەختکردنەوە لە پەیوەندیی ستراتیجی و مێژوویی هەردوولا

وەزیری دەرەوەی ئێران دووپاتیکردەوە، پەیوەندییەکانى نێوان ئێران و عێراق، ستراتیجییە و لەسەر بنەماى مێژوو و ڕۆشنبیریی و ئایینیى قوڵ و بەرژەوندیی هاوبەش لەنێوان گەلانى هەردوولادا بونیادنراوە.

سووربوونی ئێران لەسەر ڕێزگرتنی دراوسێکانی

عێراقچى  ئاماژەى بەوەشکرد، پەیوەندییەکانیان نابێت هیچ لێدوانێکى کەسیی کاریگەرىی لەسەر دروست بکات. گوتیشى "ئێران سوورە لەسەر ڕێزگرتنى دراوسێکانى و بەردەوامیدان بە گەشەپێدانى پەیوەندییەکانیان لەگەڵ عێراق لەسەر ئاستى حکومەت و گەلەکەى".

هێرشی ویلایەتی بۆسەر سەردانەکەی زەیدی بۆ ئەمریکا

ئەوەش دوای ئەوە دێت کە عەلی ئەکبەر ویلایەتی، ڕاوێژکاری ڕێبەری ئێران بۆ کاروباری نێودەوڵەتی لە وتارێکدا کە ئاژانسی تەسنیمی ئێرانی بڵاویکردەوە، ڕەخنەی لە سەردانەکەی زەیدی بۆ ئەمریکا گرت و پێیوابوو سەردانەکە لە کات و شوێنی خۆیدا نەبووە هەروەها زەیدی بە "سەرۆکوەزیرانێکی گەنج و کەم ئەزموون" ناوبردبوو.