بەرەبایانی ئەمڕۆ بوومەلەرزەیەک لە سنووری پارێزگای دیالە روویدا و بەهۆی بەهێزییەکەیەوە لە چەند ناوچەیەکی هەرێمی کوردستانیش هەستی پێکرا.

کات و گوڕی بوومەلەرزەکە

وەزارەتی گواستنەوەی عێراق و دەستەی کەشناسی و بوومەلەرزەزانی رایانگەیاند، کاژێر 06:43ـی بەرەبایانی ئەمڕۆ دووشەممە 20ـی تەممووزی 2026، بوومەلەرزەیەک بە گوڕی 4.5 پلە بەپێی پێوەری رێختەر روویداوە. هێزی بوومەلەرزەکە لە قوڵایی 10 کیلۆمەتر لە ژێر زەویدا بووە.

شوێن و چەقی بوومەلەرزەکە

بەپێی راگەیەندراوە فەرمییەکە، چەقی بوومەلەرزەکە لە رۆژهەڵاتی قەزای خانەقین بووە لە پارێزگای دیالە. شوێنی دەستپێکردنی لەرەلەرەکە نزیکەی 90 کیلۆمەتر لە رۆژهەڵاتی سەنتەری قەزای خانەقینەوە دوور بووە.

هەستپێکردن و زیانەکان

بوومەلەرزەکە بە شێوەیەکی روون لەلایەن هاووڵاتییانی خانەقین و ناوچەکانی دەوروبەری هەستی پێکراوە. هەروەها لە چەند ناوچەیەکی هەرێمی کوردستان و بە تایبەت لە پارێزگای هەڵەبجە دانیشتووان هەستیان بە لەرەلەرەکە کردووە. تاوەکو ئێستا دەزگا پەیوەندیدارەکان هیچ زانیارییەکیان لەسەر بوونی زیانی گیانی یان ماددی بڵاونەکردووەتەوە.