ئەحمەد ئەنوەر سەرۆکى دەستەى دەستپاکیى هەرێمى کوردستان ڕایگەیاند، ڕێککەوتن لە نێوان هەولێر و بەغداد کراوە بۆ دەستگیرکردنى تۆمەتبارانى گەندەڵى و هەرکەسێک داواکراو بێت لە هەرێمى کوردستان نیشتەجێ بێت دەستگیر دەکرێت.

ڕێککەوتنکراوە هەرکەسێک داواکراو بێت دەستگیر دەکرێت

گوتیشى، بەر لەم هەڵمەتە ڕێککەوتن هەبووە لەنێوان ئەنجوومەنى دادوەریی هەرێمى کوردستان و فیدراڵ بۆ ڕادەستکردنى داواکراوان و هەر کەسێک لەلایەن دادگاى عێراقەوە داواکراو بێت دەستگیرکراوە و ڕادەستیان کراوە.

بوونى بەرپرسى کورد لە لیستى ناوى گەندەڵکاران پێشبینیکراوە

سەرۆکى دەستەى دەستپاکى هەرێمى کوردستان بە کەناڵ8ى ڕاگەیاند، بوونى ناوى بەرپرسى کورد لە لیستى گەندەڵکاران پێشبینیکراوە، چونکە لە 2003وە تاوەکو ئێستا سەدان کورد پۆستیان لە حکومەت وەرگرتووە و لە ئەنجوومەنى نوێنەران وەک ئەندام دەوامیان کردووە.

پێشتر داواى زانیارى لەسەر دوو بەرپرس کراوە

گوتیشى، " پێشتر داواى زانیارى لەسەر دوو کەس لەلایەن دەستەى دەستپاکى فیدراڵى کراوە، بەڵام ئەمە بەر لە هەڵمەتەکەبووە و بوونى بەرپرسى کورد لە لیستەکە بابەتێکى چاوەڕوان کراوە.

ساڵانە لێکۆڵینەوە لە زیاتر لە هەزار دۆسییەى گەندەڵى دەکەین

سەرۆکى دەستەى دەستپاکى لەبارەى دۆسییەکانى گەندەڵى لە هەرێمى کوردستان بە کەناڵ8ى ڕاگەیاند، ساڵانە لێکۆڵینەوە لە هەزار بۆ هەزار و 100 دۆسییە دەکرێت، 200 تاوەکو 230 دۆسییە دەچێتە دادگاکان بۆ دادگاییکردن.

لە دۆسییەى گەندەڵى لە هەرێمى کوردستان ساڵانە بەرپرس و پلە باڵا هەیە

گوتیشى، لە دۆسییەى گەندەڵى لە هەرێمى کوردستان ساڵانە بەرپرس و پلە باڵا هەیە، بەڵام لەعێراق فراوانتر کارى لەسەرکراوە بودجە و تەرخانکراوى دارایی لەوێ زیاترە و مەوداى گەندەڵیش فراوانترە.