گوتەبێژی فەرماندەی گشتیی هێزە چەکدارەکانی عێراق لەبارەی بەهێزکردنی تواناکانی سوپاوە ڕایگەیاند، دوای هێرشەکانی ئەمریکا و سعوودیە بۆ سەر بارەگاکانی دەستەی حەشدی شەعبی، عێراق کار دەکات بۆ بەهێزکردنی سیستمی بەرگریی ئاسمانی و چڕکردنەوەی چالاکییە هەواڵگرییەکانی.

فەرمانی سەرۆکوەزیران بۆ ئامادەباشی

سەباح نوعمان، گوتەبێژی فەرماندەی گشتیی هێزە چەکدارەکانی عێراق بە ئاژانسی هەواڵی عێراقی گوت، عەلی زەیدی، سەرۆکوەزیرانی عێراق، فەرمانی کردووە بە بەرزکردنەوەی ئاستی ئاگادارکردنەوە و ئامادەباشی لە هەموو سەربازگە و بنکەکان و خێراکردنی جێبەجێکردنی پلانی پڕچەککردن بە سیستمەکانی ڕادار، ئاگادارکردنەوەی پێشوەختە و بەرگریی ئاسمانی مۆدێرن.

پلانە هەواڵگرییەکان و کۆنترۆڵکردنی چەک

ئاماژەی بەوەش کرد، کار دەکرێت بۆ نوێکردنەوەی پلانە هەواڵگرییە خۆپارێزییەکان بۆ پوچەڵکردنەوەی هەر بە ئامانجگرتن یان هەوڵێکی دزەکردنی پێشوەختە. سەباح نوعمان، جەختی لەسەر کۆکردنەوەی چەک لە دەستی دەوڵەت و ڕێگریکردن لە هەر هەڵسوکەوت یان جووڵەیەکی تاکەکەسی نابەرپرسانە کردەوە.

پاشخانی هێرشەکان و کاردانەوەی بەغداد

لێدوانەکەی نوعمان لە کاتێکدایە کە ڕۆژی چوارشەممەی ڕابردوو ئەمریکا و سعوودیە هێرشێکی ئاسمانییان کردە سەر چەند بارەگایەکی حەشدی شەعبی و لە ئەنجامدا 20 کەس کوژران؛ دوای هێرشەکە ڕیاز ئەو گرووپانەی تۆمەتبار کرد بە هێرشکردنە سەر دامەزراوە نەوتییەکانی، کە بەغداد ڕەتیدەکاتەوە خاکی وڵاتەکەی وەک سەرچاوەیەک بۆ ئەنجامدانی هیچ هێرشێک بەکاربهێنرابێت.