هەرێمی کوردستان داوای 14%ـی بودجەی عێراق دەکات
پووختەی هەواڵەکە:
- هەرێمی کوردستان لەسەر بنەمای سەرژمێریی نوێ داوای 14.1%ـی بودجەی فیدراڵ دەکات.
- پلەبەرزکردنەوەی فەرمانبەران و دامەزراندنی 100 هەزار کەس دەخرێتە ناو پڕۆژە بودجەی 2027.
- کۆی داواکارییە داراییەکانی هەرێمی کوردستان بۆ مووچە، وەبەرهێنان و خەرجیی نەوت دەگاتە 25 تریلیۆن دینار.
- وەزارەتەکان ڕاسپێردراون تاوەکو کۆتایی ئەم هەفتەیە ڕاپۆرتی خەرجی و داهاتی خەمڵێندراو پێشکەش بکەن.
زانیارییەک گەیشتووەتە کەناڵ8 کە حکومەتی هەرێمی کوردستان ئامادەکارییەکانی بۆ بودجەی 2027 دەستپێکردووە و دەیەوێت پشکی هەرێمی کوردستان لە 12.6%ـەوە بۆ 14.1% بەرزبکاتەوە. ئەم هەنگاوە لەسەر بنەمای داتاکانی سەرژمێریی گشتیی دانیشتووانە و تەنها پرسی مووچە ناگرێتەوە، بەڵکو پلەبەرزکردنەوەی فەرمانبەران کە لە ساڵی 2016ـەوە ڕاگیراوە، لەگەڵ خەرجیی کۆمپانیاکانی نەوت و پەرەپێدانی پارێزگاکان لەخۆدەگرێت. بڕیارە مانگی داهاتوو شاندێکی تەکنیکی بۆ جێگیرکردنی ئەم داواکارییانە بچێتە بەغداد.
وەزارەتی دارایی و پلاندانانی هەرێمی کوردستان:
- داوا دەکات پشکی هەرێمی کوردستان لە بودجەی گشتیی عێراق بۆ 14.1% بەرزبکرێتەوە.
- هەوڵ دەدات دامەزراندنی 100 هەزار کەس جێگیر بکات کە 81 هەزاریان فەرمانبەر و مامۆستای گرێبەستن و دەکرێنە هەمیشەیی.
- تەرخانی دارایی بۆ پلەبەرزکردنەوەی فەرمانبەرانی شارستانی بە 1 تریلیۆن و 150 ملیار دینار خەمڵاندووە.
- خەرجیی ساڵانەی مووچەی فەرمانبەران لە پڕۆژە بودجەدا بە 14 تریلیۆن دینار دیاری دەکات.
- داوای 25 تریلیۆن دینار دەکات بۆ کۆی پشکی هەرێمی کوردستان بە وەبەرهێنان، پترۆدۆلار و خەرجیی کۆمپانیاکانی نەوتەوە.
حکومەتی فیدراڵ و پڕۆژەی بودجە:
عێراق لە ئامادەکردنی پڕۆژە یاسای بودجەی 2027ـدا پۆلێنبەندییەکی نوێ بۆ داهات و خەرجییەکان پەیڕەو دەکات کە جیاواز دەبێت لە ساڵانی ڕابردوو. هەرچەندە لە ساڵی 2014ـەوە بەشە بودجەی هەرێمی کوردستان بە تەواوی خەرجنەکراوە، بەڵام بەغداد بۆ ساڵی داهاتوو تەنها پۆلێنبەندییەکی گشتی بۆ داتاکان دیاری دەکات. هەرێمی کوردستان جەخت دەکاتەوە کە دەبێت پێداچوونەوە بە خەرجییە سیادی و حاکیمەکاندا بکرێت و پشکی پارێزگاکانی هەرێمی کوردستان لە بودجەی پەرەپێدان و وەبەرهێنان هاوشێوەی پارێزگاکانی دیکەی عێراق دابین بکرێت.
زانیاری زیاتر بۆ تۆ
https://channel8.com/kurdish/news/217273
