نرخی بەنزین لە هەرێم گەیشتە لووتکە؛ لە دهۆک گرانترینە
پووختەی هەواڵەکە:
- قەیرانی بەنزین لە هەرێمی کوردستان بەردەوامە و بڕیارەکانی حکومەتی کاربەڕێکەر نەیانتوانی نرخەکان دابەزێنن.
- لە پارێزگای دهۆک گرانترین نرخی بەنزین تۆمار کراوە و لیترێک سوپەر گەیشتووەتە 2,500 دینار.
- بەهای سووتەمەنی بۆ یەک مانگ لە دهۆک یەکسانە بە نیوەی یان تەواوی مووچەی زۆربەی هاونیشتمانییان.
- جیاوازیی نرخی بەنزین لە نێوان شارەکاندا بارگرانییەکی گەورەی بۆ شۆفێران لە هەولێر و دهۆک دروست کردووە.
ڕوونکردنەوەی زانیاریی کە بە کەناڵ8 گەیشتووە دەریدەخات کە نرخی بەنزین لە هەرێمی کوردستان بە شێوەیەکی مەترسیدار بەرزبووەتەوە، بەجۆرێک لە هەندێک شار خەرجی مانگانەی سووتەمەنی یەکسانە بە تەواوی مووچەی فەرمانبەرێک، ئەمەش دوای ئەوە دێت کە بڕیارەکانی حکومەتی کاربەڕێکەر نەک هەر کێشەکەیان چارەسەر نەکرد، بەڵکو قەیرانەکەیان قووڵتر کردەوە.
نرخەکان لە پارێزگاکانی هەرێمی کوردستان:
- لە پارێزگای دهۆک گرانترین نرخی بەنزین تۆمار کراوە، کە تێیدا لیتری نۆرماڵ بە 1,550 و موحەسەن بە 2,250 و سوپەر بە 2,500 دینارە.
- لە هەولێر نرخی لیترێک بەنزینی نۆرماڵ 1,490 دینارە و موحەسەن بە 2,200 و سوپەر بە 2,400 دینار مامەڵەی پێوە دەکرێت.
- پارێزگای سلێمانی نرخەکانی بەراورد بە هەولێر و دهۆک نزمترن، بەجۆرێک نۆرماڵ بە 1,200 و موحەسەن بە 1,750 و سوپەر بە 1,900 دینارە.
- لە پارێزگای هەڵەبجە نۆرماڵ بە 1,350 و موحەسەن بە 1,450 و سوپەر بە 1,550 دینار دەفرۆشرێت.
خەرجی مانگانەی هاونیشتمانییان بۆ سووتەمەنی:
خەرجی مانگانەی شۆفێرێک بۆ 200 لیتر بەنزینی نۆرماڵ لە دهۆک دەگاتە 310,000 دینار، لەکاتێکدا هەمان بڕ لە سلێمانی 240,000 دینارە، ئەمەش جیاوازییەکی 70,000 دیناری لە نێوان ئەو دوو شارەدا دروست کردووە. دۆخەکە بۆ بەنزینی سوپەر قورسترە؛ لە دهۆک خەرجی مانگانە دەگاتە 500,000 دینار، کە ئەم بڕە یەکسانە بە تێکڕای مووچەی زۆربەی فەرمانبەران، لەکاتێکدا هەمان جۆری بەنزین لە هەڵەبجە تەنیا 310,000 دینار لەسەر هاونیشتمانییان دەکەوێت. بەم پێیەش نرخی یەک لیتر بەنزینی نۆرماڵ لە دهۆک یەکسانە بە نرخی یەک لیتر بەنزینی سوپەر لە پارێزگای هەڵەبجە.
کێشەی بەنزین لە کەیەوە سەریهەڵدا؟
لە 6ـی حوزەیران نرخی یەک لیتر بەنزینی نۆرماڵ لە هەولێر بۆ هەزار و 175 دینار بەرزبووەوە و رۆژێک دواتر لە سلێمانیش نرخ بەرزبووەوە و گەیشتە هەزار و 50 دینار، لەدوای ئەو رێکەوتەوە بەنزین رۆژ بە رۆژ نرخی بەرزتر دەبێتەوە، پێش 6ـی حوزەیران، لە هەرێمی کوردستان نرخی لیترێک بەنزینی نۆرماڵ لە نێوان 850 بۆ 900 دینار بوو.
بڕیارەکەی حکومەتی کاربەڕێکەر بۆ نرخی بەنزین
بۆ دابەزینی نرخی بەنزین، 20ـی تەممووز وەزارەتی سامانە سرووشتییەکانی هەرێمی کوردستان رایگەیاند، نابێت نرخی بەنزینی نۆرماڵی بازرگانی لیتری بە 850 دینار زیاتر بفرۆشرێت. رۆژێک دواتریش نرخی بەنزینی موحەسسەنی بە هەزار دینار و سووپەری بە هەزار و 200 دینار دیاریکرد، بەڵام جێبەجێ نەکرا و دوای چەند رۆژێک لە کەمیی بەنزین، 28ـی تەممووز بازاڕ ئازادکرا، ئێستا لە تابلۆی نرخی بەنزینخانەکان چەندین نرخی جیاواز دەبینیت.
زانیاری زیاتر بۆ تۆ
نرخی بەنزین لە هەرێم گەیشتە 2 هێندە و بڕیارەکانی حکومەت بێسوود بوون
بڕیارەکانى حکومەتى کاربەڕێکەر گرانبوونى زیاترى بەنزینیان لێکەوتووەتەوە
بڕیارەکانى حکومەتى کاربەڕێکەر نەیانتوانى کۆتایى بە قەیرانی بەنزین بهێنن
سامانە سروشتییەکان بۆ هەرزانکردنی بەنزین داوای نەوت لەعێراق دەکات
3 کاتژمێر پێش ئێستا