وەزیری گەنجینەی ئەمریکا: پێویستە دەسەڵاتی ئێران کۆتایی پێ بێت
پووختەی هەواڵەکە:
- سکۆت بێسێنت: دەسەڵاتی ئێران یان لە ناوخۆوە دەڕوخێت یان لە رێگەی فشارە ئابوورییەکانمان.
- سکۆت بێسێنت: پێشبینی دەکەم نرخی بەرمیلێک نەوتی خام ببێت بە 40 بۆ 50 دۆلار.
سکۆت بێسێنت، وەزیری گەنجینەی ئەمریکا ڕایگەیاند، پێویستە دەسەڵاتی ئێران کۆتایی پێ بێت، ئەوەش یان لە ڕێگەی ڕاپەڕینی خەڵکەکەوە دەبێت یان بە بەردەوامیی فشارە ئابوورییەکەیان، سەبارەت بە نرخی سووتەمەنیش پێشبینی دەکات نرخی بەرمیلێک نەوتی خام ببێت بە 40 بۆ 50 دۆلار.
لێدوانی وەزیری گەنجینەی ئەمریکا لەگەڵ لەسەر ئێران
- سکۆت بێسێنت :ئێرانییەکان خەڵکی مەزنن، لەبەر ئەوە شایستەی دەسەڵاتێکی باشترن.
- سکۆت بێسێنت :لە ڕێگەی گەمارۆ و فشاری توندی ئابوورییەوە شکستیان پێدەهێنین.
- وەزیری گەنجینەی ئەمریکا : بەردەوام دەبن لە فشارە ئابوورییەکان تاوەکو تەواو لاوازیان دەکەن.
- ئێران ناتوانێت یەدەگی نەوتی خۆی پڕبکاتەوە لەکاتێکدا بارەکان لەسەر تەنکەرەکان لە گەرووی هوورمز گیریان خواردووە.
وەزیری گەنجینەی ئەمریکا لە چاوپێکەوتنێکدا لەگەڵ کەناڵی فۆکس نیوز ئاماژەی بەوەکرد کە پێویستە ئەم دەسەڵاتەی ئێران کۆتایی پێ بێت، گوتیشی: "ئەوان 47 ساڵە دەستیان بەسەر ئەو وڵاتەکەدا گرتووە و جیهان لەمە بێدەنگە، ئێرانییەکان خەڵکی مەزنن، لەبەر ئەوە شایستەی دەسەڵاتێکی باشترن".
وەزیری گەنجینەی ئەمریکا دووپاتیکردەوە، دەسەڵات لە ئێران یان دەبێت لە ناوخۆدا بگۆڕدرێت، یان خەڵکەکە ڕاپەرن، یاخود ئەوان لە ڕێگەی گەمارۆ و فشاری توندی ئابوورییەوە شکستیان پێدەهێنن.
ئەمریکا بەردەوام دەبێت لە فشارەکان
ئەوەشی خستەڕوو کە ئەوان بەردەوام دەبن لە فشارە ئابوورییەکان تاوەکو تەواو لاوازیان دەکەن، جەختی لەوەش کردەوە لە دوای سەپاندنی گەمارۆ دەریاییەکەیانەوە ئێران نەیتوانیوە نەوت بە گەرووی هوورمزدا ڕەوانەی چین بکات، گوتیشی ، ئێران ناتوانێت یەدەگی نەوتی خۆی پڕبکاتەوە لەکاتێکدا بارەکان لەسەر تەنکەرەکان لە گەرووی هوورمز گیریان خواردووە.
زنجیرەیەک سزای نوێ لە دژی ئێران
وەزیری گەنجینەی ئەمریکا باسی لە سەپاندنی زنجیرەیەک سزای نوێ کرد بەسەر ئێراندا و گوتی: "هیوادارین ناچار نەبین سزا بەسەر بانکی زیاتردا بسەپێنین و ئەوەش بەندە بەوەوە کە چەندە خێرا دەتوانن لە پشتیوانیکردن لە دەسەڵاتی ئێران بوەستن".
زانیاری زیاتر بۆ تۆ
ئەمریکا سزای بەسەر بانکێکی تورکیادا سەپاند
یەکێتیی ئەورووپا بە فەرمی بەشداری لە هەڵمەتە ئابوورییەکەی ئەمریکا دژ بە ئێران دەکات
وەزیری گەنجینەی ئەمریکا: ڕێوشوێنی ئابووریی بێ وێنە بەرامبەر ئێران دەگرینەبەر
