پووختەی هەواڵەکە

• بەپێی نوێترین ڕاپرسی لە 31 پارێزگای ئێران، لەسەدا 66.1ـی هاووڵاتییان لە کەمیی وزە و بەشەخۆراکی ڕۆژانەیان نیگەرانن.

• زیاتر لە نیوەی بەشداربووان هۆکاری پچڕانی کارەبا و ناهاوسەنگیی وزە بۆ خراپیی بەڕێوەبردنی بەرپرسانی وڵاتەکەیان دەگەڕێننەوە.

• لە کاتێکدا کورتهێنانی بەنزین ڕۆژانە گەیشتووەتە 10 ملیۆن لیتر، هەڵاوسانی ئابووری نرخی پێداویستییە سەرەکییەکانی بە شێوەیەکی بەرچاو بەرزکردووەتەوە.

---

ئیبراهیم شیرعەلی، سەرۆکی دەزگای ڕاپرسیی خوێندکارانی ئێران ڕایگەیاندووە، لە ڕاپرسییەکی تەلەفۆنیدا لە سەرتاسەری 31 پارێزگای وڵاتەکە دەرکەوتووە، کە لەسەدا 66.1ـی هاووڵاتییان بەهۆی قەیرانی وزە و کەمیی بەشەخۆراکەوە تووشی نیگەرانی بوونەتەوە.

---

ئەنجامی ڕاپرسییەکە و دۆخی کارەبا

• ڕاپرسییەکە لەنێوان 10 بۆ 16ـی حوزەیران لە ڕێگەی پەیوەندیی تەلەفۆنییەوە لە سەرانسەری وڵاتدا ئەنجامدراوە.

• دەزگای ڕاپرسیی خوێندکارانی ئێران ناوەندێکی ناحکومییە و ساڵانە بەدواداچوون بۆ نیگەرانی و بۆچوونی خەڵک لەسەر پرسە جیاوازەکان دەکات.

• لەسەدا 51.4ـی بەشداربووان ناهاوسەنگی و پچڕانی کارەبایان بۆ خراپیی ئیدارەدانی بەرپرسانی کەرتی کارەبا گەڕاندووەتەوە.

• بەرپرسانی ئێران چەمکی ناهاوسەنگیی وزە بۆ کەمیی بەنزین، کارەبا و گاز بەکاردەهێنن و هۆکارەکەشی بۆ دۆخی جەنگ و گەمارۆ ئابوورییەکان دەگەڕێننەوە.

کورتهێنانی بەنزین و دوو هێندەبوونی نرخەکەی

لە هەفتەکانی ڕابردوودا حکومەتی ئێران نرخی هەر لیترێک بەنزینی حکومی لە نزیکەی 5 هەزار تمەنەوە بۆ 10 هەزار تمەن بەرزکردەوە، ئەمەش نیگەرانیی هاووڵاتییانی لێکەوتەوە. هاوکات بەڕێوەبەرایەتیی کۆمپانیای نیشتمانیی پاڵاوتن و دابەشکردنی بەرهەمە نەوتییەکانی ئێران ئاشکرایکردووە، لە ئێستادا ڕۆژانە بە قەبارەی 10 ملیۆن لیتر بەنزین کورتهێنانیان هەیە.

زانیاریی زیاتر لەسەر بابەتەکە

بەگوێرەی ئامارەکانی ناوەندی ئاماری ئێران، بەرزبوونەوەی بەردەوامی نرخی بەنزین ڕێژەی هەڵاوسانی ساڵانەی لە وڵاتەکە گەیاندووەتە لەسەدا 67. ئەم دۆخە ئابوورییە وایکردووە نرخی پێداویستییە پزیشکییەکان، کرێی تاکسی و پەیوەندییەکان بە ڕێژەی لەسەدا 113.8 بەرزببنەوە، هاوکات نرخی زۆربەی کەلوپەلە سەرەتاییەکان و خواردن لە بازاڕەکاندا سێ بۆ پێنج هێندە زیادیکردووە.

زانیاریی زیاتر بۆ تۆ

یۆرۆ نیوز: هەڵاوسانی خۆراك لە ئێران گەیشتووەتە 108%

ناوەندی ئاماری ئێران: هەڵاوسان گەیشتە %62 و نرخی خۆراک %133 بەرزبووەوە

قەیرانی ئابووریی ئێران؛ هەڵاوسان بەرزترین ئاستی لەدوای جەنگی جیهانیی دووەمەوە تۆمار کرد