
ماوەی چوار ڕۆژە منداڵێکی 11 مانگ لە باکووری کوردستان بێسەروشوێنە و لەسەر دیارنەمانیشی، دایک و باوکی منداڵەکە و چوار کەسی دیکە دەستگیرکراون.
ڕۆژی 10ـی ئەیلوول، لە گوندێکی سەربە شارۆچکەی "دیڤریگ" لە پارێزگای سێوازی باکووری کوردستان، منداڵێکی 11 مانگ بە ناوی بوشرا بێسەروشوێن بوو، ئەو خێزانەی منداڵەکەیان ونبووە، بەمەبەستی ئاژەڵداری لە ئامەدەوە چوونەتە ئەو گوندەی سێواز.
لەسەر دیارنەمانی منداڵەکە، دایک و باوکی منداڵەکە و چوار کەسی دیکە دەستگیرکراون و سێ کەسی دیکەش ئازادکران، کە ڕۆژانی ڕابردوو لەسەر هەمان دۆسیە دەستگیرکرابوون.
پاش چوار ڕۆژ لە دیارنەمانی، ڕۆژی دووشەممە، جلوبەرگەکانی منداڵەکە لە دووریی دوو کیلۆمەتر لە شوێنی ونبوونی دۆزرایەوە.
لەگەڵ ئەوەی گومان دەکرێت، بوشرا لەلایەن ئاژەڵی کێوییەوە بردرابێت، بەڵام جلوبەرگی منداڵەکە نەدڕاوە و خوێنی لەسەر نییە.
دایکی منداڵەکە لە دووەم دانیشتنی لەگەڵ لێکۆڵەران گوتوویەتی، باوکی بووشرا لە بەرامبەر پارەدا بوشرای بە کەسێکی دیکە داوە و باوکی منداڵەکەش ئەو قسانەی هاوسەرەکەی ڕەتدەکاتەوە و تەنیا دەڵێت، بوشرا ونبووە.
هێزە ئەمنییەکان و تیمە تایبەتەکانی لێکۆڵینەوە، تەواوی کامێراکانی ناوچەکە و ئەو ئۆتۆمبێلانە دەپشکنن، کە ڕۆژی ونبوونی بوشرا بە گوندەکە و دەورووبەریدا تێپەڕیون.
وەزارەتی خێزان و کاروباری کۆمەڵایەتیی تورکیاش دەڵێن، خێزانەکە کە لە گوندەکەدا لەنێو چادردا بوون، چوار منداڵی دیکەیان هەیە و خراونەتە ژێر پارێزگاریی دەوڵەتەوە.
