پووختەی هەواڵەکە:

• چوار سەرۆکایەتییەکەی عێراق لە سەرۆکایەتیی کۆمار کۆبوونەوەیەکی باڵا ئەنجام دەدەن.

• کشانەوەی هێزەکانی ئەمریکا لە 30ـی ئەیلوول لە تەوەرە سەرەکییەکانی کۆبوونەوەکەیە.

• پرسی تەواوکردنی کابینەی حکومەت و هەماهەنگیی دامەزراوەکان گفتوگۆی لەبارەوە دەکرێت.

• کۆکردنەوەی چەک لە دەستی دەوڵەت و گفتوگۆ لەگەڵ گرووپە چەکدارەکان تاوتوێ دەکرێت.

---

زانیاریی گویشتووە بە کەناڵ8 کە چوار سەرۆکایەتییەکەی عێراق لە کۆبوونەوەیەکی هاوبەشدا کۆمەڵێک دۆسیەی چارەنووسسازی ئەمنی و سیاسی تاوتوێ دەکەن، بە تایبەتی پرسی چەک و تەواوبوونی کاتی کشانەوەی هێزەکانی ئەمریکا، لە کاتێکدا هەوڵەکان بۆ یەکلاکردنەوەی پۆستە بەتاڵەکانی ناو کابینەی حکومەت دەستیپێکردووە.

---

سەرچاوەیەک لە سەرۆکایەتیی کۆماری عێراق لەبارەی کۆبوونەوەکە بە کەناڵ8ـی ڕاگەیاند:

• کۆبوونەوەکە کاتژمێر 5:00ـی ئێوارەی ئەمڕۆ لە کۆشکی سەرۆکایەتیی کۆمار لە بەغداد بەڕێوەدەچێت.

• هەریەک لە نزار ئامێدی سەرۆککۆمار، عەلی زەیدی سەرۆکوەزیران، هەیبەت حەلبووسی سەرۆکی پەرلەمان و فایەق زێدان سەرۆکی دەسەڵاتی دادوەری بەشدار دەبن.

• پرسی تەواوکردنی پێکهاتەی کابینەی حکومەت و ڕێککەوتن لەسەر وەزارەتەکان لە تەوەرە سەرەکییەکان دەبێت.

• هەماهەنگیی نێوان هەرسێ دەسەڵاتی جێبەجێکردن، یاسادانان و دادوەری بۆ مامەڵەکردن لەگەڵ دۆخی گشتیی وڵات تاوتوێ دەکرێت.

دۆسیە ئەمنییەکان، کۆنترۆڵکردنی چەک و کشانەوەی ئەمریکا:

لە بەشێکی دیکەی کۆبوونەوەکەی سەرۆکایەتییەکاندا، پرسی کۆتاییهاتنی کشانەوەی هێزەکانی ئەمریکا لە 30ـی ئەیلوول تاوتوێ دەکرێت؛ هاوکات سەرکردەکانی عێراق میکانیزمی کۆکردنەوەی چەک لە دەستی دەوڵەت و چۆنیەتیی گفتوگۆکردن لەگەڵ گرووپە چەکدارەکان دەخەنە بەرباس، بە ئامانجی جێگیرکردنی ئاسایشی ناوخۆیی و ڕێگریکردن لە بەکارهێنانی خاکی عێراق بۆ ململانێ سەربازییەکان.

پێشینە و ئاڵنگارییەکانی بەردەم عێراق:

ئەم کۆبوونەوە چوارقۆڵییەی سەرکردەکانی بەغداد هاوکاتە لەگەڵ نزیکبوونەوەی وادەی کۆتاییهاتنی ئەرکی سەربازیی هاوپەیمانان لە عێراق؛ لە لایەکی دیکەشەوە، بوونی چەک لە دەرەوەی دامەزراوە فەرمییەکان و هەستیاریی ڕەوشی ناوچەکە وایکردووە دامەزراوە باڵاکانی دەوڵەت هەوڵی داڕشتنی هەڵوێستێکی یەکگرتوو بدەن بۆ بەڕێوەبردنی قۆناغی دوای کشانەوەی هێزە بیانییەکان و سەپاندنی سەروەریی یاسا.

زانیاریی زیاتر بۆ تۆ:

عێراق خۆى بۆ ئاهەنگى ڕۆژى سەروەرى و کشانەوەى ئەمریکا ئامادە دەکات

حکومەتی عێراق سێ ڕۆژ پشووی فەرمیی ڕاگەیاند

ئەمریکا بنکەی پاڵپشتیی دیپلۆماسیی ڕادەستی عێراق دەکاتەوە

هێزەکانی تورکیا هاوشێوەی ئەمریکا و هاوپەیمانان لە عێراق دەکشێنەوە