هێزەکانی تورکیا هاوشێوەی ئەمریکا و هاوپەیمانان لە عێراق دەکشێنەوە

پووختەی هەواڵەکە

عێراق و تورکیا گەیشتوونەتە ڕێککەوتن تاوەکو کۆتایی ئەمساڵ هێزەکانی تورکیا لە هەردوو سەربازگەی بەعشیقە و زیلکان بکشێنەوە.

سەرۆکوەزیرانی عێراق و سەرۆککۆماری تورکیا لە پەراوێزی کۆبوونەوەکانی نەتەوە یەکگرتووەکان وادەی فەرمیی کشانەوەکە ڕادەگەیەنن.

حکومەتی عێراق لەسەر کشانەوەی هێزەکانی تورکیا لە سنوورەکانی هەرێمی کوردستان سوور نییە بەهۆی پاساوەکانی تورکیا بۆ پاراستنی سنوورەکانی.

بەگوێرەی ئەو زانیارییانە، کە بە کەناڵ8 گەیشتوون، سەرچاوە باڵا ئەمنییەکانی عێراق ئاشکرایانکردووە، بەغداد و ئەنقەرە ڕێککەوتوون لەسەر ئەوەی تاوەکو کۆتایی ئەمساڵ تەواوی هێزەکانی تورکیا لە سەربازگەکانی بەعشیقە و زیلکان بکشێنەوە و ڕادەستی سوپای عێراقیان بکەن.

وردەکاریی سەردانی شاندە ئەمنییەکەی عێراق بۆ تورکیا

شاندێکی باڵای ئەمنیی عێراق بە سەرۆکایەتی قاسم عەبدوی، ڕاوێژکاری باڵای ئاسایشی نیشتمانی سەردانی تورکیایان کردووە.

شاندەکە داواکاریی فەرمیی عێراق و نامەی عەلی فالح زەیدی، سەرۆکوەزیرانی عێراقیان گەیاندووەتە ڕەجەب تەییب ئەردۆغان، سەرۆککۆماری تورکیا.

ئەنجامی دیداری نێوان شاندە ئەمنییەکان ئەرێنی بووە و ئەردۆغان دوای کۆبوونەوەکە لە پەیوەندییەکی تەلەفۆنیدا لەگەڵ سەرۆکوەزیرانی عێراق ئامادەیی بۆ کشانەوە دەربڕیوە.

هەردوو سەربازگەی بەعشیقە و زیلکان کە دەکەونە دەشتی نەینەوا، بە هەماهەنگیی هاوبەش ڕادەستی سوپای عێراق دەکرێنەوە.

ڕێککەوتنی فەرمی و دۆخی سنوورەکانی هەرێمی کوردستان

لە پەراوێزی کۆبوونەوەکانی نەتەوە یەکگرتووەکان لە چەند ڕۆژی داهاتوودا، عەلی زەیدی سەرۆکوەزیرانی عێراق و ڕەجەب تەییب ئەردۆغان سەرۆککۆماری تورکیا کۆدەبنەوە و بە فەرمی کاتی کشانەوەی هێزەکان لە هەردوو سەربازگەکە ڕادەگەیەنن، هاوکات دەربارەی بوونی سەربازیی ئەنقەرە لە ناو خاکی هەرێمی کوردستان و سەر سنوورەکان، بەغداد پێیوایە کە پرسەکە پەیوەستە بە پەیوەندییەکانی نێوان هەولێر و ئەنقەرە و بەهۆی پاساوەکانی تورکیا بۆ پاراستنی ئاسایشی خۆی، لەسەر چۆڵکردنی ئەو ناوچانە زۆر ڕژد نابێت.

زانیاریی زیاتر لەسەر بابەتەکە

ئەم ڕێککەوتنەی نێوان بەغداد و ئەنقەرە لە چوارچێوەی بڕیاری فەرمیی دەوڵەتی عێراق دێت بۆ کۆتاییهێنان بە بوونی سەرجەم هێزە بیانییەکان لە وڵاتەکەدا، کە تێیدا لە ڕێگەی دانوستاندنی دیپلۆماسی لەگەڵ وەزیری دەرەوە و دەسەڵاتدارانی باڵای تورکیا توانراوە هەنگاوی سەرەتایی بۆ ڕادەستکردنەوەی بنکە سەربازییەکانی دەشتی نەینەوا بنرێت.

زانیاریی زیاتر بۆ تۆ

گرووپى ئەسحابولکەهف: ڕادەستکردنى چەک بەندە بە کشانەوەى هێزەکانى ئەمریکا و تورکیا

زەیدی: 30ی حوزەیرانی 2027 دواین وادەی ڕادەستکردنی چەکی گرووپەکانە

ناوەندی توێژینەوەی کەناڵ8 ڕاپۆرتێکی لەبارەی کاریگەریی کشانەوەی هێزەکانی هاوپەیمانان بڵاوکردەوە

وەزارەتی بەرگریی تورکیا: هێزەکانى تورکیا لە عێراق کشانەوە

گوتەبێژی نوجەبا لە چاوپێکەوتنی کەناڵ8: وادەی دیاریکراو بۆ چەکدانان بە هیچ شێوەیەک گونجاو نییە

خەزعەلی: تورکیا گرووپی چەکداری لە عێراق هەیە و دەیەوێت سیناریۆکەی سووریا لە عێراق جێبەجێ بکات