پوختەی هەواڵەکە

• ئەمڕۆ شاندى هەرێمى کوردستان سەردانى بەغداد دەکات
• شاندەکە لەسەر پشکی هەرێمی کوردستان لە بودجەی 2027  دەچێتە بەغداد

---

پەیامنێرى کەناڵ8  لە بەغداد ڕایگەیاند، شاندەکە بە سەرۆکایەتیى ئومێد سەباح، سەرۆکى دیوانى ئەنجوومەنى وەزیران و ئامانج ڕەحیم، سکرتێرى ئەنجوومەنى وەزیران سەردانى بەغداد دەکەن و لەگەڵ وەزیرى دارایی عێراق کۆدەبنەوە.

---

هەرێمی کوردستان داوای شایستەی خۆی دەکات

• شاندەکە لەگەڵ بەرپرسانى کورد لە حکومەتى عێراق، گفتوگۆ دەکەن تاوەکو پشتیوانى لە داواکارییە یاساییەکانی هەرێمى کوردستان بکەن لەناو بەشە بودجەى هەرێمى کوردستان لە چوارچێوەى بودجەى گشتیی 2027ـى عێراق.
• لە ماوەى ڕابردوودا، شاندەکە سەردانى بەغدادیان کرد و لەگەڵ وەزیرى نەوت و دارایی و پلاندانان و بەرپرسانى دیکە کۆبوونەوە.
• پشکى هەرێمى کوردستان لە پرۆژە بودجەى عێراق بە 12.70% دانراوە، بەگوێرەى دوایین سەرژمێریى گشتیی عێراق، ژمارەى دانیشتووانى هەرێمى کوردستان 14.14% بووە و هەرێمی کوردستان دەیەوێت ئەو ڕێژەیە جێگیر بکرێت.
  
  

ئاڵنگارییەکانی بودجەی 2027

هەرێمى کوردستان داوایکردووە لە بودجەى سیادیى عێراق پشکى هەبێت، بەڵام بەغداد بودجەى سیادى لە بودجەى گشتیی دەردەکات، پاشان پشکى هەرێمى کوردستان دیاریدەکات، ئەوەش کاریگەریى ڕاستەوخۆى لەسەر کەمکردنەوەى بەشە بودجەى هەرێمى کوردستان دەبێت.

ئاڵنگارییەکى دیکە کە ڕووبەڕووى بەشەبودجەى هەرێمى کوردستان بووەتەوە، خەرجیی ڕاستەقینە (ئینفاق فعلی)یە کە بووەتە هۆکارێکى دیکە بۆ کەمکردنەوەى بەشە بودجەى هەرێمى کوردستان.

---

ڕێککەوتنەکان هەموار بکرێنەوە

لە دۆسییەى نەوتى هەرێمى کوردستان ڕێککەوتنى سێ قۆڵیى وەزارەتى نەوتى عێراق و سامانە سروشتییەکان و کۆمپانیا بەرهەمهێنەرەکان هەیە، ئەو ڕێککەوتنە پێویستى بە هەموارکردنەوەیە تاوەکو گلدانەوەى نەوتى خاو بۆ هەرێمى کوردستان لە 50  هەزار بەرمیل ڕۆژانە زیاد بکرێت و شایستەى دارایی کۆمپانیاکانیى نەوتیش جێگیر بکرێت.

پڕۆژە بودجەى گشتیی عێراق لە ئێستادا لە ئەنجوومەنى وەزیرانى عێراقە و بڕیارە تاوەکو ناوەڕاستى ئەم مانگە ڕەوانەى ئەنجوومەنى وەزیران بکرێت.

پڕۆژە بودجەى گشتیی 2027ـى عێراق گوژمەکەى بە 200 تاوەکو 240 تریلیۆن دینار خەمڵێنراوە و هەرێمى کوردستان داواى نزیکەى 29 تریلیۆن دینارى کردووە بۆ مووچە و پلە بەرزکردنەوەى فەرمانبەران و داواى دامەزراندن و بە هەمیشەییکردنى مامۆستایان و فەرمانبەرانى گرێبەستیشی کردووە.

زانیاری زیاتر بۆ تۆ

وەزارەتی پلاندانان و شاندی هەرێمی کوردستان بودجەیان تاوتوێکرد

شاندی هەرێمی کوردستان لە بەغدادە؛ دۆسییەی زیندانیانی سیاسی دەخرێتە ناو بودجەی 2027